Faamanatu 75 tausaga o le tina, Peka Faumuina Ah Siu

Faataoto 31:29, ‘E toatele fafine e amio lelei i latou, a o oe, ua faasilisili oe ia i latou uma.’ O nisi ia o fuaitau e talitonu sa tutupu ae i loto ma finagalo o alo o le tinā ia Peka Faumuina Ah Siu, e molimauina ai le tele o galuega lelei a si o latou tina, auā e silisili lava o ia nai lo auro ma penina. E afua mai i le logomalie o saafiafiga alofa aemaise le matagofie o tapenaga sa faatinoina.
O le aso malolo a Ausetalia, aso 26 o Ianuari (Australia Day) sa atofaina e alo ma fanau a le tina matua o Peka Faumuina Ah Siu, e faia ai se faatasiga ma faamanatuina ai le 75 tausaga o si o latou tinā. O le tina matua ia Peka Ah Siu e feasiasiai lava i nai ona alo i atunuu i fafo ae na soifua mai o ia i le alalafaga o Matavai Safune i le aso 27 o Ianuari i le tausaga e 1935.
Sa taitaia le sauniga lotu e le susuga i le Faafeagaiga Manumalo Malolo ia Pr Aileone Sefelino o le ekalesia Aso Fitu o le Toe Afio mai i Logan lea o loo galulue ai se tasi o alo o le tinā matua ia Peka, le susuga ile Faafeagaiga ia Pr Jedidiah ma le faletua ia Alofa Ah Siu. E toafitu alo o le tina matua ia Peka sa malaga mamao mai i isi atunuu ona o pelega lava o matua.
O le ulumatua a le tina matua ia Peka Ah Siu, o Helena, sosoo ai Petia, Tiatuau, Pr Jedidiah, Juanita, David Tuisalogo ma le tamaitai o Ruth sa malaga mai Amerika. E tolu alii ae toafa tamaitai.
O lea faamoemoe sa faataunuuina lava i le fanua o le ekalesia Aso Fitu o le Toe Afio mai i Logan.
Sa faatumuina i le auvalaaulia, o le paia foi ma le mamalu o le ekalesia Aso Fitu i Logan ma isi ekalesia o le Matagaluega i Kuiniselani.
E ese foi le matagofie i le tagatagai atu ma le vaavaai atu i nisi o nai tama ma nai tina matutua sa auai ua ova atu i le valusefulu fitu tausaga, ma le isi tina ua valusefulu iva tausaga, faatasi ai ma le tama matua ia Maiava Aumau Mau sa ia mauaina le meaalofa mai i le Siufofoga o le Penina o Asuisui 1197am, ona o ia o se tama pito matua sa faamauina e le alaleo ua iva sefulu ona tausaga.
Sa tulai lava le susuga i le faafeagaiga ia Pr Jedidiah Ah Siu e fai ma fofoga o le aso o si o latou tina.
Sa iai nisi o polokalame matagofie sa faatinoina e alo ma fanau e pei ona fesiligia ai le ekalesia o loo lotu ai le tina matua, ae tuuina atu ni meaalofa ia i latou e mateina ni fesili e faatatau lava i le tina matua ia Peka Ah Siu ma lona soifuaga.
O le Susuga ia Manō Kalamelu Manō mai le alalafaga o Siumu sa fai ma sui o le auvalaaulia ma le ekalesia e momoli se faafetai i le aiga o le tina matua ia Peka ma le Susuga ia Pr Jedidiah ma le mamalu o le aigā-alii e tusa ma faaaloaloga masani o le aso.
Na taape le au valaaulia ma le mama ua lomi ma le vaa ua goto auā na tofu le gogo ma si ana i‘a. Manuia tele lou 75 Tausaga Peka Faumuina Ah Siu, mai i le Siufofoga o le Penina o Asuisui-1197AM i Brisbane.