Ua sau le vaa na tiu, tau mai le vaa na tau, ae o loo mamau pea lago o le vaa na fao afolau. O le aso o le viiga ma le faamanū e patipatia ai le alofa o le Atua ina ua mafai ona aulia mai le 70 tausaga o le susuga ia Muliagatele Fuiono Faala Faaiuaso.
Sa faatumulia le faleaiga o le Valentine i Pitone i ona aiga mai Falealupo, ma aiga o lona faletua o Sofia, aiga Sa Matafeo i Leauvaa, toatele foi i latou sa auai na malaga mai Ausetalia, Samoa ma Aukilani.
O se mafutaga fiafia i le alofa o le Atua ona ua mafai ona faatasia aiga uo ma ē masani i le aso fiafia o le tamā, ua lē gata o se avanoa e mafuta faatasi ai aiga ae o se laolao lelei foi mo fanau.
O le tatalo ma faamanuiaga a aiga ma fanau ia toe faaopoopo e le Atua nisi aso ma nisi tausaga se tele mo ia, ma ia tumau pea le faamalologa i lona soifua auā o ona tiute ma galuega o loo galue ai i totonu o le aiga ma le ekalesia aemaise o le mafutaga ma le tina ma le fanau.
Faaanuiaga ma alofaaga mai ia Tuala Asa Leaupepe, Papalii Fereti Leaupepe, Lemoa Soifua, Akenese ma Fulu Opetaia ma le fanau faapea le tina ia Sofia Muliagatele Fuiono, Faaiuaso Roni Amanda ma le fanau, Pii ma le fanau.
Aemaise o Sala Sofeni Kuini ma le fanau, Lemalu Tuipulotu ma Ake ma le fanau, Apulu Paselio Tafili Solinuu ma le fanau, Paulo ma le fanau, Vaasili Vito Kifa ma le fanau, Iuliana Tuala ma le fanau, faapea aiga mai Falealupo ma Leauvaa i Samoa. Ia manuia tele le atoaga o lou 70 tausaga.
