O se faamoemoe na faatumulia i le mamalu o le atunuu aemaise o aiga ma paaga masani i le aso na atofaina e faamanatu ai le 70 tausaga o le tamalii saili malo o le atunuu i totonu o Brisbane, le afioga ia Tauiliili Peseta Ata Malifa.
Na taitaia le sauniga e se vaega o le Ipswich Bahai Youth. E toalima i latou na fai sao e ala i tatalo ma tusitusiga paia. Na faafeiloai aloaia le aofia e le afioga ia Lavea Tupuola Lemalu Sione Malifa ae fai lava ma fofoga o le aso le faletua ia Elisapeta (faletua o Tauiliili Malifa).
E tele malo faaaloalogia e aofia ai susuga i faafeagaiga sa auai, le aufaipisinisi, taitai ma sui mai Mafutaga ma faalapotopotogasa aemaise le lagolago a aiga, uo ma paaga. Sa auai le faletua ia Lillian Ala‘i, o ia sa ia uluai faailoaina pe momoli atu le faatuatuaga Bahai i Samoa i le tausaga e 1953.
O le afioga ia Tauiliili Peseta Ata Malifa o se tamalii ua lauiloa i tulaga tau faasalalauga amata mai le leitio a le Laumua i Ueligitone ona see mai lea avea ma Convenor o le leitio 4EB i le tele o tausaga ua mavae, lea ua avea nei ma sui i le taimi nei a o tu mai le foe Timu Fenunuti i lenei paeaiga.
O se tasi foi lea o tamā matua na tele ina faaaopoopo ai isi itula ma aso e ala i le faafofogaaga a le atunuu i lea foi alaleo. Sa galue foi i ofisa a le malo e iai le falemai, ofisa malaga faapea le Nusipepa a le Pacific Star i aso ua alu. Na auai mai foi le susuga ia Papalii Titiuatoa Malietoa Tanumafili II na malaga mai Niu Sila.
Ua mae‘a paepae ulufanua le faamoemoe ma ua tini le uto e pei o ia upu auā a foi le aofia ma le mama ua lomi ma vaa ua gogoto o faafiafiaga ae sili le taumafa saunia lelei ma le sasala na saunia e le Uncle Sam’s Take Away (Poulava Papalii Sam ma Lorna Matautia).
