Faamanatu 51 tausaga o lou saolotoga Samoa i Melepone

O le apa fafano ma le ie soloi o le ata o le soifua tautua na faatino e Keriso Iesu le faaao o le Ekalesia, o le feau faamanatu foi lea mo Samoa uma i taimi o sisigafu‘a, ona o soifua tautua atunuu o tupu ma tamalii lotoa na asaina le gasu ma lagaina lo tatou manumalo, laia ua lagomau mai tiasa, ua ta maua ai nei lo ta saolotoga.
O le finagalo autū lea o le upu folafola na saunoa i ai le susuga i le Sea o le sinoti a le Ekalesia Metotisi i Melepone, lea na taitaia le sauniga lotu, le susuga i le faafeagaiga taulagi ia Uato‘a Nonoa, ae o le aufaipese tuufaatasi lava a le sinoti na lagiina viiga o le Atua.
O le afiafi o le Aso Sa na mavae atu, na faatumulia ai le malumalu o le Ekalesia Katoliko le St Anthony i le pitonuu o Noble Park, i le paia lasilasi o Ekalesia eseese aemaise o le mamalu maualuga o Samoa potopoto, e patipatia ma sii faatasi le viiga i le Atua le faavae o Samoa, e faamanatu ai le tutoatasi.
O le fofoga o le faamoemoe o le fetalaiga ia Aufaamulia Anthony Sofe, na faafeiloaia le atunuu, ona tutulai ai lea ae molimoli mai i totonu le tagavai o le saolotoga o lo tatou malo, sosoo ai ma le sauniga lotu, ona usuina ai lea o vii o tagavai o le malo tele o Ausetalia aemaise o Samoa, ma faagasolo ai saunoaga autū o le aso. Na saunoa muamua le susuga ia Stanslauz Atoa, le taitaifono o le fono faufautua mo tagata Samoa i Vitoria,  sosoo ai ma saunoaga a sui o le City Council ma le faiga malo a le Setete o Vitoria, faatasi ai ma saunoaga a taitaifono o isi fono e lua a tagata Samoa i Vitoria, o le fetalaiga ia Namulauulu Feo o le fono a le Logomua, ma le afioga ia Falanaipupu Mino Su‘a o le fono a le Sootaga o tagata Samoa i Vitoria.
Na sosoo loa ma le taumafataga māmā na saunia e le Fono Faufautua, na tali ai le sua ma taumamafa Samoa na aofia potopoto, ona alo ai lea o le Fono Faufautua i tu ma aga masani mo aso tetele faapenei.
Na tu tootoo le fetalaiga ia Tiumalu Nofoituala Faatau auā faaaloaloga mo le taitai o le sauniga le susuga i le Sea, aemaise o faaaloaloga  mo le mamalu i le aufaigaluega paia, ona alo foi lea o le faleupolu o tofiga mo la latou matafaioi, lea na fai ai le fofoga o Levaopolo ma sui o Samoa potopoto.
Na saunoa faafetai le susuga i le Sea ma faamanuia i le Fono ona o le galuega mae‘a ma le faamoemoe matagofie, ma faaiuina ai i le tatalo na saunia e le faafeagaiga malolo manumalo ia Amosa, ma ta‘ape ai Samoa ma le mama ua lomi, ma le agaga o le faamanū ma le faafetai.