Leai se mea sili atu ona taua nai lo le loto fiafia ma le agaga faafetai e ave a’e ai le viiga i le Atua, ina ua aulia manuia ma e le afioga ia Fonoti Leu Scott le 50 tausaga o lona soifua.
E lei oo se manatu o le tamaitai o le a na vaaia ma maua se avanoa lelei e fiafia ai ma mafuta ai ma ana uo aemaise o si ona tuaa, o aiga foi ma nai ona uso aemaise o le fanau i se mafutaga faalilolilo na tapenaina lelei e le tina ia Faalogoifo Tofa Vui, le fanau ia Albert Scott ma Mariahvictoria Scott aemaise o le susuga i le faifeau ia Salamasina Tim Toilolo ma le faletua ia Fepulea‘i Lagi, o nai ona aiga ma uso, auā le faamanatuina ai o lona aso soifua i le afiafi o le Aso Toonai.
Na matuā faate‘ia le tamaitai aso fanau ina ua taunuu ane i le faleaiga e leai ma se tagata o iai ae faafuasei loa ona faafeiloai atu ia e le auvalaaulia ma pepese fiafia e faailoa atu ai o le pati o lona aso soifua le mea lea ua pisapisao mai.
Saunoa le faletua ia Fepulea‘i Lagi faatoa mautu le tonu i le Aso Lua o le a fai se mafutaga faalilolilo (surprise party) e faamanatuina ai le 50 tausaga o Fonoti ma tapenaina loa. Na mua lava foi mea i Matautusa i le viiga ma le faafetai i le Atua na saunia e le susuga i le faafeagaiga, Susuga Salamasina Tim Toilolo e tusa ma le faamoemoe ona faagasolo ai foi lea o le polokalame matagofie i lea po.
O faamanuiaga ma moomooga alofa mo lau afioga Fonoti Leu Scott, ia manuia tele lou aso soifua ma ia saga faaaogāina pea lou soifua e le Atua i taleni, o tofi ma tiute ua na faamanuiaina ai oe i totonu o le aiga, o le ekalesia aemaise o faalapotopotoga o loo e auauna atu ai. Alofaaga mai lou tuaa, le tina ia Faalogoifo Tofa Vui, o au uo ma aumea mamae, o nai ou aiga uma i Aotearoa nei ma atunuu i fafo atu aemaise o nai ou alo ma lau manamea ia Magele. Happy birthday Fonoti!
