Soo se tagata e valaauina e le Atua e fai ma taitai, e ao ona talitonu i lona valaauina, “Aua o pule uma lava e mai le Atua lea”, o lea ia outou ava ma matata‘u i le Atua ua faavae ai Samoa.
“E tatau ona toe saili i le Atua ina ia faaolaola le talalelei i aai o finagalo, ua laalaa pea i luma Samoa i le poto ma le tamaoaiga, ae pau lea ia tatou saili pea i le Atua ma lana Amiotonu e mausali ai lo tatou faamoemoe”.
O nisi ia o saunoaga faalaeiau o le lauga na saunia ma tapenaina e le susuga i le faifeau Rev Lapana Faletolu (St Paul’s Pacific Trinity Church) i le sauniga lotu o le faamanatuina o le 48 tausaga o le Tutoatasi o Samoa lea na faia i le malumalu Katoliko i Barbadeos i Kalaiesetete i le afiafi o le Aso Sa, aso 6 Iuni 2010.
O lenei sauniga tuufaatasi faapitoa sa auai i ai ekalesia eseese o loo i lenei aai.
O le Afioga Patele Paulo Filoialii sa taitai i le sauniga na faatumulia i nisi o le aufaigaluega a le Atua sa mafai ona auai faapea le mamalu o ekalesia, faatasi ai ma le fono faufautua a matai Samoa i Kalaiesetete.
Na faatofusia susuga i alii faifeau na auai i le tauaveina o tofiga o le sauniga, e pei o le tatalo sa fofogaina e le susuga i le Toeaina Tumama Vili (EFKS i Wooston), Pastor Tavita Seumanutafa (AOG) faapea Pastor Moega Lasei (Samoan Christian Church i Linwood).
O le faitauina o le Tusi Paia sa feagai ma le Susuga Fitifiti Luatua (Ekalesia Samoa Sailimalo PIC i Aranui) faapea le tausi matagaluega Susuga Ale Palelei (Metotisi i Kalaiesetete).
Ina ua mae‘a ona faaulufale le mamalu o le aufaigaluega aemaise Samoa ua potopoto ma ekalesia taitasi, na faapea foi ona molimoli mai le fu‘a o le malo e sui o le fono faufautua matai Samoa, ona tutulai lea i le usuina o le Vii o le Saolotoga ma amata faasolo loa polokalame o le sauniga.
E matagofie naua le saunia lelei o viiga o le Atua e ekalesia taitasi e pei o le Katoliko Roma, EFKS, St Paul’s Pacific Trinity Church faapea le faletolu Matagaluega Metotisi (Hallswel, Atinitone & Kalaiesetete).
Manaia foi le fetogiai o lima o le aufuataimi ae faapena foi le tatagi ane o nota eseese o piano. Matalasi foi le vaai i le talenia o fanau tupulaga i agavaa faamusika aemaise le sagisagi mai o nai tina ma tamā matutua i le faamaopoopoina o le faamoemoe.
Sa faapena ona sasaoina se taulaga masani mo le malumalu matagofie sa faia ai le sauniga, pau lava lea ua fai sina vave atu o le itu palagi e faaaogā le malumalu a o tau faauma le sauniga faapitoa o le aso.
O le sui o le fono faufautua sa avea ma fofoga fetalai e faafetaia le tauaaoina o le sauniga ma tuumuli atu ai loa i le hall mo le iputi, auā se faamafanafana o le afiafi. “Ia manuia tele le faamanatuina o le 48 tausaga o le Tutoatasi o Samoa”.
