O le vaiaso talu ai na faamanatuina ai le 30 tausaga o le auaunaga a le Pacific Business Trust (PBT), lea sa faatumulia ai le latou ofisa ogatotonu i Otahuhu i le aoauli o le Aso Lua talu ai. O se faalapotopotoga a le malo, mo le fesoasoani i le faalauteleina o le manuia o pisinisi ma kamupani o loo faafoeina e tagata Pasefika i totonu o Niu Sila.
Sa auai sui mai Ueligitone o le Matagaluega o Pisinisi ma Galuega le MBIE (Ministry of Business Innovation and Employment), le tamaitai o Matalena Leaupepe, o ia o loo fautuaina le matagaluega i mataupu tau tagata Pasefika.
I se vaega o lana lipoti, sa ia faailoa ai e na o le 1,300 kamupani i totonu o Niu Sila o loo pulea ma taitaiina e tagata Pasefika. Sa ia faalauiloa auaunaga fesoasoani a le Matagaluega mo le faalauteleina o le manuia o Pisinisi. E lē gata i lea, sa avea lea avanoa na faalauiloa ai le Faatonu fou a le PBT le alii Samoa o Rob Neru mai Ueligitone, faatoa 2 masina i le galuega, ma ua silia ma le 25 tausaga lona tomai tau pisinisi, e pei ona faalauiloaina i luga o le upega o fesootaiga a le faalapotopotoga.
O se amataga fou ma le tāua o lea auaunaga, auā i le 30 tausaga talu lana tautua, e toatele lava nisi o tagata Pasefika faipisinisi, latou te lē o silafia lea fesoasoani, e lē gata mo le faaaupegaina aemaise fautuaga ma le lagolagoina o o tatou tagata, auā e tāua tele le fai pisinisi mo le faalauteleina o le tamaoaiga o Niu Sila i le itu tau tupe (Economic Growth) aemaise le faafaigaluegaina o tagata lautele (employment). Na ta‘ua e Matalena, o le tausaga 2014, e 80 kamupani a tagata Pasefika sa latou auai i se suesuega (Research), mo le faatalanoaina e le Matagaluega o ni mea tāua o loo moomia ai le fesoasoani. Sa latou iloa ai, o mea e 4 e pito sili ona moomia e kamupani nei: O le tupe (funding), o le fautua faapisinisi (business mentoring), o le faalauiloa atu o le pisinisi (marketing), ma le moomia o le aoaoina (training).
Ina ua mae‘a le taumafataga matagofie o le aoauli, na sosoo ai lea o le polokalame i se faaauupegaina o taitai ma pule o kamupani ma ē fai pisinisi (Business Summit). Sa faalauiloa ai nisi o malo faaaloalogia ua manuia a latou kamupani ma ua amanaia a latou auaunaga i totonu o Niu Sila. Sa laualuga ai lava o tatou alo ma fanau Samoa, e pei o le afioga Namulauulu Lale Ieremia mai le Arrow International, Galu Letiu o le South Coast Construction, Agnes Loheni o le MENA Fashions, Tyrone McCauley o le Pik Pok Ltd, ma le alii Rarotonga o Sean Rota o le Amuri Group ma le alii Tonga o Isaac Rolfe o le Idesign Media.
Sa latou faamatala le talaaga o le sailiga malo, ma auala na latou maua ai le manuia. O nisi o latou e pei o le Arrow International, ua laasia le $450 miliona i le tausaga o tupe maua.
O le kamupani latou te fauina fale ma fai konekarate faakamuta. Sa faamatala e Tyrone mai le Pik Pok Ltd lana kamupani latou te fauina (design) polokalame tau taaloga lea e faaaogā i luga o telefoni feaveai ma play station, ua sili atu ma le 200 taaloga ua latou gaosia, e pei o le Into the Dead ua sili atu ma le 40 miliona tagata o loo faaaogāina (downloads), ma le taaloga o le Turbo ua sili atu ma le 60 miliona downloads, aemaise le latou taaloga soka o loo numera tasi i totonu o le UK. E tele auaunaga tāua a le PBT o loo faalauiloa i luga o le latou upega o fesootaiga i le www.pacificbusiness.co.nz.
