Na faateia le Taitai o le Ekalesia AOG Faapotopotoga a le Atua (itu palagi) i le Aso Sa 24 o Aperila i le maoa‘e o tapenaga a lana Ekalesia i Inala, e faamanatu ai le atoaga o le tolusefulu tausaga talu ona amata faavaeina le Ekalesia i le pitonuu o Inala.
Na lauga lana auauna i taimi o le sauniga ma faafetaia le Atua i Lona Aao taitai ua aulia ai le 30 tausaga e ala i le taitaiga a Lona Mana. O le viiga lava e maualuga e lē faaitiitia. E leai se manatu o le Taitai i nisi tulaga pau lava o lea, ia faafetaia le Tupu i le lagi, peitai na faagaeetia ma matuai faatumulia i laua i le olioli i le tautua lotu o lana Ekalesia.
Na malaga mai Kalaisetete le Taitai ia Ps Alaivanu ma le faletua ia Va Toma ma amata fuafua le galuega i Kuiniselani i le tausaga e 1981, ma o le aso 14 o Aperila o lea lava tausaga na tino mai ai ma avea o se Ekalesia faavaeina.
E fitu matāfale sa uluai amata ma fofoa mai ai lenei Tovine, ma ua tupu ma ola mafalā i le taimi nei, ua 25 matāfale ae selau sefulu ma le ono tagata lotu e aofia ai ma alo ma fanau.
O se galuega sa fitā i tuga i ai lana auauna ma le faletua faapea le nofoātoo ma le lautele o le Ekalesia, ma e sefulu ni Ekalesia AOG na fananau mai i le tina lenei o Inala (Mother church).
Ua oo atu i le 14 Ekalesia o le Matagaluega i Kuiniselani o loo i lalo lava o le taitaiga a le Taitai, Ps Alaivanu Toma ae o loo tofu lava Ekalesia ma faafeagaiga, ma o se tovine sili foi ona olaola ma tupu i totonu o lenei aai pe a molimauina i nisi o a latou faatasiga.
O le Aso Toonai na se‘i mavae atu nei, 30 o Aperila, na tuufaatasia ai le fale sefulufa i se fonotaga tele e sauni atu ai ma tapena le Matagaluega atoa a Kuiniselani e talimalo i le Fonotele e tauaofia mai ai le Matagaluega Aoao AOG a Ausetalia, lea o le a usuia i le masina o Novema o le tausaga nei.
O le tele o mataupu sa talanoaina, o le soalaupuleina lava o fuafuaga uma ina ia lava tapena ma lava saunia nofoaga ma soo se vaega auā lea fono tele. Talosia ia ‘au le Atua ma fuafuaga uma auā le sologa lelei o polokalame faataatitia mo le fonotele a le Matagaluega AOG.
Manuia le atoaga o le 30 tausaga Ps Alaivanu ma Va Toma ma le Ekalesia a Inala!
