“E lē o se mea faaleaoga le tautiga i le galuega a le Atua.” O saunoaga ia na malele i ai le taitai o le Ekalesia Assembly of God i Niu Sila le susuga i le faafeagaiga ia Ailaulau Faletutulu e momoli ai ona alofaaga ma faamanuiaga i le susuga ia Puleisea Yang Tung o loo tausia le galuega a le Atua i le Ekalesia AOG i Papakura, i le faamanatuina o le 25 tausaga talu ona laua leoleoina le lafu mamoe.
O le susuga i le faafeagaiga ia Puleisea Yang Tung ma lona faletua ia Jullie Yang Tung na amata mai le la galuega i totonu o lenei aulotu i le tausaga 1990 i le vaiaso muamua o Aperila, ina ua tuua e le susuga i le faafeagaiga ia Toleafoa Siu ma le faletua ia Mamele le galuega ae see atu i le isi tovine i Magele.
O se aulotu toatele ma ola lenei galuega, aemaise ai o totonu o lenei ekalesia o loo faafailele mai ai le soifua galue o nisi o tamafanau o Samoa o loo iloga i totonu o taaloga lakapi e pei o le susuga ia Jerome Kaino ma Bundy Aki.
O le viiga ma le faaneetaga i le Atua ina ua atoa le 25 tausaga o le susuga i le faafeagaiga i totonu o lana lafu mamoe. Na avea ai le susuga i le aoao ia James Saipani ma taitai o le sauniga, o ia foi sa tulai i le upu folafola a le Atua, auā lava se faamalosi ma se tomatau i lana auauna e ala i lana galuega fita o loo fofoaina ma tapue ai agaga o lana fanau faaleagaga.
O lenei tapuaiga sa faataunuuina lava i le malumalu o le Ekalesia AOG i Papakura. O le upu faauuina a le Atua ma molimau matagofie sa fai lea ma asoa ma mama faamau i le loto o lana auauna e galue ai pea ma faaauau lona valaauina e pei ona tofia ai i laua e le Atua.
O se avanoa lelei foi na saunoa faafetai ai Pastor Puleisea i lana fanau faaleagaga e tusa ai ma lo latou alolofa ma le onosai i le galuega, ae lē gata i lea o lana faafetai i le susuga i le faafeagaiga ia Sula ma lona faletua ia Ula sa molimauina lea sauniga paia, ae faapea foi i tuaa o si ona toalua sa mafuta atu.
Na faatinoina foi e le autalavou ma fanau laiti ni aitema e faamaualuga ai le viiga o le Atua aemaise ai o latou alofaaga ma faamanui
aga i le latou tamā faaleagaga. Sa faapea foi ona faafofoga le ekalesia i molimau ma faamanuiaga mai isi faafeagaiga faapea ma tamafanau o lenei aiga lotu o loo salalau i isi atunuu sa auina mai i luga o le upega tafailagi.
Na faaauauina lenei mafutaga fiafia i le faia o le toonai tele a le Ekalesia atoa ma le auvalaaulia e patipatia ai le lelei o le Alii.
E ui ina fai i lagi le folauga a le tina o le galuega ia Jullie ae na vaaia lava le loto fiafia o le susuga ia Pastor Puleisea Yang Tung i le faamanatuina o le 25 tausaga o le laua galuega.
Faaalia le lagona misia e lana auauna o le tina ona o le faamoemoega lea o le tele o mea e fai i totonu o le aulotu aemaise o le ekalesia aoao e pei ona valaauina ai laua e le Atua.
E toatolu o laua alo o loo faaaogāina foi i totonu o le Ekalesia i le autalavou ma le Aoga Aso Sa.
