O le loto faafetai ma le viiga o le Atua, lea ua pese ai le tamaitai o Tarrantina Elizabeth Rosanna Tuliloa, faatasi ai ma ona mātua ia Fata Andrew Tuliloa ma le tina ia Pauline Tuliloa, o grandparents, o aiga uo ma ē masani aemaise o i latou uma na malaga mai i Ausetalia, ma latou faapea ane faatasi, Lou Agaga e, ia faamanu atu ia Ieova o mea uma foi o i totonu ia te au ia matuā saga faamanū atu i lona suafa Paia.
Ae o le faamalosi a le taitai o le sauniga le susuga i le faafeagaiga ia Salamasina Toilolo i le afiafi o le Aso Toonai ua mavae ona faataunuuina ai lenei faammoemoe. “Na ou iloa oe i le manava o le tina ae e te lei fanau mai,” o lona uiga e silafia e le Atua ou laasaga ae lei fanau mai.
O se afiafi fiafia i aiga o le tamā ma aiga o le tina aemaise o le auvalaaulia ona ua tau lau o le faamoemoe e pei ona faamanatuina ai le 21 o se tasi o le fanau, ae lē gata i lea o le toatele o nisi ua mafai ona asia lea nofoaga i luga o le fogafale 3 o le Ellerslie Convention Centre. O le tāua i le tamaitai ia Tarrantina o lenei faamoemoe ona ua mafai ona feiloai ai ona aiga uma, ae lē gata i lea o ana uo i le kalapu a North Shore o loo taalo ai le netball.
O molimau eseese mai ona aiga aemaise o lona tamā i le taimi na foai ai le ki na manino ai i le faafofoga a le auvalaaulia i le lelei ma le talenia o le tamaitai ia Tarrantina, ae faapea foi i le saunoaga faaopoopo a le susuga i le faafeagaiga ia Salamasina Toilolo i lona ola faaleagaga na atili faamausali ai lona olaga o se teine e fiafia i le Alii. O le ola ma le fiafia o tagata i lea po, o fika a le fofoga o le po le susuga i le aoao ia Tavai Meni i le faagasoloina o le polokalame, aemaise ai o le tu‘itu‘i o musika a le alii o DJ Viane.
O faafiafiaga na tapenaina e aiga mai Ausetalia ma aiga i Niu Sila nei, ae taualuga i le show a le Happy Hour Dance Group lea na a‘e ai le saa i le sukamolo ae pese le aso fanau. Na faaiu le mafutaga i le tatalo faamanuia a le susuga i le faafeagaiga ma tatala ai loa le filialii.
