O le Tiafau Hall a le ekalesia EFKS i South West Brisbane sa faailogaina ai le 21 tausaga o le tamaitai o Talaimanu Malifa i le Aso Toonai na tea nei. Sa amataina i le faafetai i le Atua sa saunia e le autalavou a le Faatuatuaga Baha‘i, sosoo ai ma tulaga masani o le foaiina o le ki ma le faamanuiaga a mātua ma apoapoaiga mo le lumanai.
Na matuai faamalieina le galala o le aofia i le felanulanuai ma le saunia lelei o taumafa sa tapenaina e le Uncle Sam’s Catering (Poulava Sam & Lona Matautia).
Sa faamaliena foi le toatele o le mamalu o le atunuu i le lelei tapenaina o fuafuaga uma aemaise o faafiafiaga sa sioa ma maua ai le fiafia o le auvalaaulia.
Na faaauau tulaga e masani e pei ona masani ai aso faapenei. O mātua lava o Talaimanu sa faatautaia le aso ile faapolokalameina.
Sa saunoa le afioga a Savea Levale Lio e fai ma sui o le auvalaaulia e faamanuia le aso fanau o le tamaitai ona ta‘ape ai lea ma faamavae le auuso ae foi lava le viiga i le Atua.
Ia manuia tele le atoaga o lou 21 tausaga Talaimanu. Ia saga foai pea e le Atua nisi aso se tele mo lou soifua.
Alofaaga ma faamanuiaga auina atu i ou tuagane pele, taitoalua ma fanau, ou aiga uma ma lau ekalesia ae faasilisili alofaaga o ou mātua pele Tauiliili Ata Petesa Ata ma Elisapeta Malifa.
