O se mea matagofie ae mafuta ma fiafia faatasi aiga, uo ma aumea mamae aemaise o se tasi e lei mafuta muamua i ai. Ua avea lea o se mafutaga poo se aiga e tasi i lenei soifuaga.
O le faamanatu Aso Faraile 13 o Fepuari, na avea ma se isi avanoa e toe feiloai ai tagata o aiga, o uo ma aumea mamae aemaise o le aufaigaluega a Pitone i le Fisher and Paykel Healthcare. O se mafutaga fiafia i tagata uma ona e seasea maua ia avanoa e fai taumafataga ma talatalanoa faatasi ai.
O le tofa ia Seiuli Seloti o ia lea sa faafeiloaia le mamalu o le auvalaaulia, ae o le susuga i le faafeagaiga ia Faleu Futi sa fai ma fofoga o le aso. O Rev Iosia Faleupolu Tiatia o le tausi matagaluega a le ekalesia i Otara na taitaia le sauniga lotu e momoli ai le viiga ma le faafetai i le Atua ona o nei tausaga e tele ua faaopoopo i le atalii.
O le masani o mātua pe a foai se ki e faapea, e lē o se ki e tatala ai le saolotoga i le olaga o le tama poo le teine talavou ae o le ki e toe faamautu ai le loto alofa ma le fiafia i mātua aemaise o le Atua. O upu foi ia na toe timai ai le tina matua le afioga ia Tausa Tuluvao Tausa Futi i si ana tama o Pitone ma tauaao atu ai loa le ki o lona aso fanau.
Na molimau foi si ona tamā ia Talo Tuu Ofisa Telea i le latou mafutaga ma si ona atalii. Na sosoo ma le feulaina o le keke ma faagasolo ai loa ma le taumafataga. Na maualuga le aso ina ua faafiafia le ausiva lauiloa a le Tatau Dance Crew ma le Jweenz mai Kelston.
O faaaloaloga na saunoa ai le tofa ia Alae Anitelea e fai ma fofoga o aiga na lua e molimoli le agaga faafetai i le susuga i le ositaulaga o le aso faapea uo ma ē masani ona o le auai atu e patipatia faatasi le 21 tausaga o se tasi o le fanau, sa faapea foi ona saunia ma ni meaalofa mo le mamalu o le auvalaaulia.
O Pitone Sam Junior Jerrard Futi Telea o le alo matua o le susuga ia Talo Tuu Ofisa Telea ma le faletua ia Talifaaifo Motiana Futi Telea ma o loo galue nei i le kamupani o le Fisher and Paykel Healthcare.
