Faamanatu 21 tausaga o Maryann Marini Alofipo

O le fanau o le meaalofa mai le Atua, o aso ma tausaga e faaopoopo i lo latou soifua o se faamanuiaga lea i mātua, aiga, uo ma ē masani.

A atoa ma aulia e se tamaititi lona 21 tausaga ona manatu lea o nisi, ua aulia tausaga o le saolotoga, peitai o nisi foi ua aulia se tasi laasaga o le olaga ina ia tagata matua ma tausinio ai i mea lelei.

E pei o upu faamalosi o le lauga a le susuga a le faafeagaiga AOG i Otara, Seleni Taoai, na faia le sauniga lotu o le aso fanau, ‘Ia faamuamua le Atua i le olaga, e
manuia ai.’

O le Aso Toonai na tea nei, na atoa i ai le 21 tausaga o le tamaitai o Maryann Marini Alofipo o Otara. E na o Maryann le teine o le fanau e toafā, toatolu nai ona tuagane, ma o le vaiaso nei foi, ua amata ai i le AUT. O se aso fiafia ma le matagofie, le faatasiga ma le faamanatuina o le aso fanau o le tamaitai o Maryann.

O taimi faapenei, e faaalia ai le alofa faavalea o mea nei o mātua ia latou fanau, e ui ua leva ona fai i lagi le folauga a si ona tamā, Kopelani Alofipo, peitai o si ona tina o Pu‘a Alofipo na tu malosi i le tapenaga o le aso fanau o si a la tama, ma o ia foi na fai ma fofoga o le po. Na taualuga lava le po i faafiafiaga ma le taumafataga mamafa na talamasineia ai le afifio atu o le auvalaaulia ma aiga ma uo o le tamaitai fai aso fanau. Ia manuia lou 21 tausaga Maryann
Marini Alofipo!