O le ava ma le usitai i mātua o le tele foi ia o aso e faaopoopo ma faoiina e le Atua, o le faamalosi ma le faalaeiau lea a le susuga i le fesoasoani o le ekalesia Katliko, susuga ia Ameko Falaniko sa taitaia le sauniga o le faamanatuina o le 21 tausaga o le tamaitai ia Christina Huch i le maota o le Nga Tapuvae i le Aso Toonai ua mavae.
O se aso lagilelei, ma na faatumulia i le toatele o le auvalaaulia aemaise o aiga na lua o le tamaitai o Christina. Na mae‘a le sauniga sosoo ai ma le faapaiaina o le keke, ona saunoa lea o le tamā ia Pou i lana molimau i le la mafutaga ma lona afafine, faatasi ai ma le foaiina o le ki o le faailoga o le isi laasaga fou o le teine talavou pe a atoa le 21 tausaga.
Sa momoli le faafetai a le tamaitai o Mouena i ona mātua ona o le la tausiga faamātua ua ia aulia ai nei tausaga e tele. O mātua o Christina, o le tamā ia Pou ma le tina ia Susana. O le fofoga o le aso o le susuga Muliagatele Matini, o ia foi sa tu tootoo i le taimi o faaaloaloga mo le mamalu o le auvalaaulia.
E momoli ai foi faamanuiaga ma moomooga alofa o mātua ma aiga mo oe Christina, ina ua e aulia le 21 tausaga o lou soifua. O le tatalo ia foai pea e le Atua nisi aso ma nisi tausaga se tele tatou te mafuta ai. Ia manuia lou aso fanau!
