O aso faapenei e manatua ai galuega lelei a mātua sa faatinoina i fanau a o laiti, mai lava i le 1 le tausaga seia oo i le 20 tausaga, o le fafaga ma faaaogā ae faapea foi ma le tausi i aso uma ma le faatonu ina ia manuia le olaga ma maua le lumanai lelei, o le 21 tausaga o le isi lea sitepu fou o le olaga o le tama ma le teine talavou ua oo i ai le matua o lona soifua.
O le faamanatuina o le atoaga o le 21 tausaga o le alii o Joseph Mikaele, na molimau ai le titi faitama o mātua ma aiga ae lē gata i lea o ana uo ma ē masani sa faatasi uma atu e sii faatasi le taulaga faafetai i le Atua ona o nei tausaga e tele ua ia aulia.
O sui o le Ekalesia o le EFIS i Newton, o le susuga i le aoao ia Tavai Meni ma lona faletua ia Maria Meni, susuga i le faafeagaiga ia Jake Langrygge ma nisi o sui o lana autalavou sa auai uma i lea afiafi.
O le faleaiga o le Valentine i Pakuranga na faataunuuina ai lenei faamoemoe i le Aso Toonai ua mavae 14 o Mati. O le faateleina o le viiga i le Atua e ou le malosi ma le mana ua foai i le atalii na avea ai le susuga i le faafeagaiga ia Faapaia Tuigamala ma ositaulaga.
O le susuga ia Pastor Jake na saunia le tatalo e faapaia ai le keke o le aso fanau. O le tuaa o le alii o Joseph le tina ia Lemafoe Mikaele na foaiina le ki o le 21 tausaga o si ona alo. Ae o si ona tuaa ia Rolani Mikaele sa nafa ma le faasoasoani o polokamale o le po (MC).
Sa faapea foi ona faia le faafiafiaga a le alii fai aso fanau faatasi ai ma molimau a ana uo mai lana ekalesia o loo galue ma lotu ai.
O le fuafuaina o lenei faamoemoe sa taulamua ai lava ona tuafāfine ma ona uso faapea lona aiga. O le matagofie o lenei mafutaga ua mafai ai ona feiloai auauna a le Atua o loo galulue i isi tovine ae lē gata i lea o aiga ma uo.
Na momoli le agaga faafetai o le susuga i le faafeagaiga ia Rolani Mikaele i auauna a le Atua sa mafai ona faatasi atu ae faapea foi i le auvalaaulia. Na saunia foi ni teutusi e fai meaalofa ai e talimasinei ai le susū atu ma molimau le atoaga o le 21 tausaga o si ona alo.
O le susuga ia Tofilau sa fai ma sui o le auvalaaulia e faaleo se upu faafetai e talifaitau ai i le saunoaga a le fofoga o le aso. O Joseph Mikaele o le alo e faasino i le susuga i le faafeagaiga ia Rolani Mikaele ma le faletua ia Lemafoe Mikaele o loo galulue i le Ekalesia EFIS i Newton.
