Faamanatu 21 Anthony Milford

Na faatumulia le kalapu lakapi a le South i Acacia Ridge i le po o le Aso Toonai na tea nei i le faamanatuina o le 21 tausaga o le susuga ia Anthoy Milford. Pei ona lausilafia o se tasi lea alo o le atunuu o loo lauiloa i tulaga tau taaloga e pei ona taalo ai i le kalapu lakapi a le Broncos.

Na soifua mai Anthony Milford i le aso 11 o Iulai 1994, peitai faatoa faailogaina lona 21 i le po o le Aso Toonai ona faatoa maua ai lona avanoa mai taaloga, foi sa taalo i le po o le Aso Faraile, na manuia le latou ‘au.

O ona tuaa o le susuga ia Halo ma le faletua ia Polu Milford. O le kalapu lakapi liki a le Souths i Acacia Ridge, sa faatinoina ai le aso fiafia o Anthony, o iina foi sa amataina ai lona soifua taalo i le taaloga lakapi.

O le afioga ia Patele Epati Tamati sa feagai ma se upu faalaeiau auā le soifua o Anthony i le taleni lakapi aemaise o lona soifua i totonu o le aiga. Na maualuga le faamoemoe i le faatasi mai o le afioga ia Patele Paletasala Leota o loo galue o ia i Canberra.

Na auai foi ma Fr Stephen o ia o le Patele o le palisi i Inala o loo auai nai ona mātua, aemaise tamaitai sa o Sister Antonia ma Sister Elisapeta.

O se po matagofie i le fiafia o le auvalaaulia ina ua mafai ona vaai tino i nisi o tama taaalo o le ‘au a Brisbane Broncos sa auai.

O Anthony sa taalo i Canberra Raiders mo se 2 tausaga ae talu ai ona o le misia o lona aiga, lea sa ia galue malosi ai lava ina ia vave ona toe oo mai i lona aiga i Brisbane lea la ua tali le Atua pei ona iai le taimi nei ua taalo lava mo le Broncos ma ua mitamita foi si ona aiga.

Toatele le mamalu o le atunuu o loo lagona le fiafia i le taalo foi a le susuga ia Anthony Milford e tusa ai ma lona soifua taalo i le au a le Broncos. Na tofusia foi le auvalaaulia ma matu palapala e ala i faaaloaloga na maau ma milomilosia i ai le aiga alii.

Manuia lou 21 Anthony Milford! Ia faatuputeleina pea lou malosi, usitai i mātua ma faamuamua le Atua i ou ala uma. Alofaaga e auina atu i ou mātua, uso ma tuafāfine faapea ou grandparents, aunties, uncles, cousins, uo ma paaga masani ma lau ekalesia Katoliko.

 Mātua o Anthony Milford ia Halo ma Polu Milford faapea si o latou Tina matua ia Seumanu Ana Otemai o loo uuina le ki o le 21 o Anthony

Anthony Milford (mitiafu paepae) ma nisi o tama taaalo a le Broncos sa auai i lona 21 tausaga