O le faatāuaina o tina ma tamaitai o se tasi o manulauti tauave a lo tatou malo ma ua faatāuaina e le tele o nuu ma afioaga aemaise o ekalesia eseese, e oo lava foi i le paia ma le mamalu o sailimalo ma nopiai i atunuu i fafo, o loo faaauau ona tauave lea matafaioi.
O le afiafi o le Aso Faraile sefulu ma le tolu o Mati na aofia potopoto ai le tele o faletua ma tausi, sa‘oao ma tamaitai e faamanatu le selau fitusefu ma le tolu o tausaga o le polokalame o le Aualofa a tina o le ekalesia o le Aupaia o Aso e Gata Ai i Glenroy Melepone. O le sini autu o le faamoemoe o le faalauiloa lea ma amanaiaina o galuega lelei a le itupa o tina o loo faia mo lea foi vaega o le ekalesia.
Na muamua ona momoli lapalapa o le lagi e ala i le sauniga paia na taitaia e susuga i epikopo ia Oliva Sae ma Falanai Talo, ona alo loa lea o tina mo lo latou aso fiafia. Na lufilufiina foi le keke mo le aso fanau ma faagasolo le taumafataga; o le peresitene o le mafutaga le susuga ia Sister Eti Mac ma le faletua ia Tumama Sae faapea Tofi Talon sa faauluulu i le tapenaina o le aso.
Na maitauina le sagisagi fiafia o tina uma sa auai mai atunuu eseese o loo tapuai i lea falelotu a le ekalesia e aofia ai ma le tele o tina Samoa.
O le auga autu lava ina ia fiafia ma fealofani le Aualofa a o tali le sua ma taumamafa faatasi, na faaiuina ma ta‘ape ma le viiga o le Tamā Sili o i le lagi ona o le anoanoai o meaalofa o loo faaaogāina ai tina mo lana talalelei ma lana ekalesia, viia ai lona suafa manumalo.
