O se faamoemoe sa faatumulia i susuga i faafeagaiga ma o latou faletua mai le pulega a lenei ekalesia faapea foi nisi o faafeagaiga na valaaulia, o aiga na malaga mai i Ausetalia, Samoa, Ueligitone ma Blenheim, i le aso na atofaina e atoa i ai le 10 tausaga o le Ekalesia o le Fountain of Salvation i Papatoetoe, lea sa faamanatuina i le Aso Toonai ua mavae, 29 o Novema 2014 i le hall a le ekalesia o le Voice of Christ i Magele.
Na taitaia le sauniga e le susuga ia Rev Misa William Hugh mai Three Kings, a o le tatalo na fofogaina e le susuga i le faafeagaiga ia Ioane Sekai o lo tausia le matagaluega i Blenheim.
O le tatalo o le faamanuiaga o le 10 tausaga ma le upu faamalosi mo le lotu na saunoa i ai le peresetene o le matagaluega i Niu Sila, Elder Pastor Belcher Sili Lam, a o le failautusi EFKS Pasefika le susuga le faafeagaiga ia Soopale Robert Faoasau na saunia upu timai ma le tatalo mulimuli.
O le tala otooto o le amataina o le galuega seia oo mai i le taimi nei na saunoa i ai le susuga i le faafeagaiga ia Iosefa Tamalii ma o laua foi ma le faletua ia Elisapeta Tamalii o loo tausia le galuega lenei i Papatoetoe.
Na faaauau le mafutaga i le taumafataga na tapenaina e le ekalesia o le Voice of Christ i Magele, ma faafiafia ai nisi o ekalesia a lenei pulega mai Manukau ma Manurewa i ni pese faaleagaga auā lava le faateleina o le viiga o le Atua.
O le tofa ia Tuaoi Iosefa sa fai ma sui o le ekalesia e tu tootoo auā faaaloaloga mo le mamalu o le atunuu na molimauina lenei aso fiafia.
O lenei galuega na faavae mai le tausaga e 2004, ma e toatolu aiga na amataina, na oo lava i le 15 aiga lolotu ma le 4 aiga fesoasoani. E lua ekalesia sa fofoa mai i le galuega lenei i Papatoetoe, o le galuega i Takanini e tolu aiga na vavae i ai sa galue ai le susuga ia Matafusi Tilo ua maliu, ma le ekalesia i Magele o loo faifeau ai le susuga i le faafeagaiga ia Pe‘a Poe ma le faletua ia Sieni.
E iva aiga o loo faaauauina nei le lotu ma le lua aiga fesoasoani.
O le tolu aiga na latou amataina le galuega e lē o toe iai a o isi matafale ua malaga mo Ausetalia auā lava le saili manuia mo aiga ma fanau.
Au Mautofi: Taeoti Tietie Samoa o loo fai lea ma aao tusitusi o le matagaluega. O le teutupe o Logotaeao Fouvale Ueni. O le taitai Aoga Aso Sa o Fouvale Ueni, o lona sui o Elisapeta Tamalii. O le failautusi o Silupevaelei Fuiava, o le teutupe o Randy Luamanu.
Youth Pastor – Sua Fuiava, Youth President – Tuaoifaatamasoalii Petelo Iosefa Tamalii o loo galue foi i le taitaiina o le faili mo viiga o le Atua faatasi ai ma le susuga ia Sua Fuiava, ma le Youth Leader – Faase Stowers.
