O Samoa o lea ua aloaia lona ofi mai i totonu o le Feagaiga ua ave ai le faatāua i tagata e iai manaoga faapitoa. O le alii Palemia, le susuga Tuilaepa Lupesoliai Sailele Malielegaoi lea ua faamalosia lea sao o Samoa e ala i lona sainia o le feagaiga faavaomalo lenei, ua aofia ai nei Samoa i le li‘o o le tele o malo o le lalolagi ua faamalosi le tulai mai e puipui avanoa mo tagata e iai manaoga faapitoa.
E iai le isi vaega mulimuli e atoatoa ai le sao o Samoa i lenei taumafaiga. O Samoa lava ia e tusa ma le 15% (pasene) o lona faitau aofai o tagata e iai manaoga faapitoa o le tino ma le mafaufau ma o le mafuaaga lea ua tele ai foi tulafono taufaaofi ua talanoaina nei ina ia mautinoa le unai o le atinae o ia sui o le atunuu.
Faaalia e le sui sooupu o le faalapotopotoga o loo unaia atinae faaleaoaoga a tagata e iai manaoga faapitoa, Faaolo Utumapu, ua tele tausaga o faatalitali i se galuega a le Malo ina ia saga unaia ai avanoa tutusa ma le atinae o aoaoga mo lea vaega o le atunuu ae o le sainia e le alii Palemia i Niu Ioka o lenei feagaiga o foliga vaaia ai o le amanaia o le tuualalo ua au tausagā o talia e i latou e iai manaoga faapitoa i totonu o Samoa.
I Samoa lava ia ua faamalosia i le tulafono le iai o vasega mo fanau e iai manaoga faapitoa i soo se aoga a le malo ma o faiaoga foi ua faatautaia a latou aoaoga ua aoaoina faapitoa lava i le Aoga a Faiaoga i le Iunivesite Aoao o Samoa i Lepapaigalagala.
O lenei taumafaiga ina ia mafai e fanau e iai manaoga faapitoa ona faifaimea faatasi ma fanau e atoatoa le malosi ma ia silasila ai foi i le mafai e oo i ai taumafaiga a fanau nei. O le aoga a le fanau e logonoa, o loo iai foi le Loto Taumafai o loo fesoasoani i ai ae ua toatele lava fanau ua agai i aoga a le Malo ma Ekalesia.
O lea foi ua mautu le aoga mo fanau aooga matutua i le SENESE lea ua galulue faatasi ai ma le Kolisi o le Faatuatua i Vaitele auā vasega ua patino lava mo le fanau logonoa. O avanoa faigaluega le isi laasaga ua unaia e le Faalapotopotoga o le Nuanua o le Alofa lea e faatautaia aoaoga mo le sailiga o galuega a i latou e iai manaoga faapitoa ma o se polokalame ua toatele lea vaega o le atunuu ua mafai ona faafaigaluegaina ai.
O le faafaigofie o le latou feoai i le taulaga, i ofisa eseese ma le mafai ona tuu le avanoa e unai ai a latou aoaoga, o mataupu uma nei ua feagai ma le SENESE atoa ai le NUANUA ina ia mautinoa le maua e nei tagata o faamanuiaga o loo maua e i latou uma lava o loo aofia i le lio lea o tagatānuu o Samoa e iai manaoga faapitoa.
O tausaga ua mavae sa tele ina vaavaai i fanau ae sa leai se fesootaiga ina ia mafai ai ona maua le faaauau atu i aoaoga ma avanoa faigalulega ma o le isi luitau lenei ua amata lava ona vaaia le faatāua e ofisa faigaluega ona o le unai pea o nei faalapotopotoga.
O le Matagaluega o Mataupu tau Tina ma Tamaitai, Atina‘e o Nuu ma Aga Fesootai lea o loo avea ma matagaluega a le Malo e unaia aiā tatau ma faamanuiaga e tatau ona maua e tagata e iai manaoga faapitoa ma o le faagasologa foi la o tulafono taufaaofi ma le faatalatalanoaina i le atunuu o le matagaluega lenei, ua ia faatautaia lea tiute ma o i latou foi la e agai sa‘o lava i ai tuutuuga o le feagaiga lenei ua sainia e le alii Palemia i Niu Ioka i Amerika.
