Susuga Denis Nelthorpe ma ta’ita’i ole Pasefika

Susuga Denis Nelthorpe ma ta’ita’i ole Pasefika

Ole Aso Lulu ua tuanai atu na faia ai se fonotaga ile pitonuu o Footscray ile aai o Melepone a taitai o tagata atumotu ole Pasefika ma le faalapotopotoga ale West Justice oloo faauluulu iai le alii faamasino o Denis Nelthorpe, lea ua galue ai foi ma se tamalii loia mai lo tatou uso atumotu o Toga le susuga ia Semisi Kailahi.

Ole auga o aute ole fono e pei ona saunoa Semisi o ia lea na ta’ita’ia le fono faatasi ma le susuga ia Fuaialii Anthony ole Samoa, ole fia maua lea ose feiloaiga a ta’ita’i ole Pasefika ma le susuga ia Denis Nelthorpe ina ia soalaupule ni auala ole a amata faatino ai le fesoasoani ale West Justice mo tagata Pasefika o alala ile itu i Sisifo ole aai. O nisi la o mataupu lea ua faataoto ole a amata faatino ai le faigapaaga ile masina o Aperila poo Me, o mataupu ogaoga e lē o malamalama ai nai o tatou tagata i suiga o tulaga i sitiseni ma nofomau a tagata Niu Sila pe a malaga mai e aumau i Ausetalia nei, e pei ona iai suiga talu mai le taausaga e 2001.

O suiga nei oloo matuā faigata ai ona maua ni fesoasoani tau penefiti mai le matagaluega ale Centerlink aemaise lava mo nai alo ma fanau iti, oloo faamoemoe tasi lava ina ia amata faigaluega mātua poo nisi o tagata matutua ile taunuu mai e lagolagoina manaoga tau tupe mo aiga.  Ole tasi o mataupu, ole talosagaina lea oni fesoasoani tau seleni mai le malo e faatino ai le sailiina oni fale e faamautu iai tagata Pasefika pe a faaletonu aiga na faamautu ai ile faatoa taunuu mai faatasi ai ma le fofoga taumafa, a’o lavalava ma aoga a nai fanau.

E lē gata i lea ae ole talosagaina foi o fesoasoani e faatāuaina ai le ola a’oa’oina o fanau, aemaise foi o mātua ina ia mafai ona galulue faatasi aiga mo le tau atina’eina.

Ole talosagaina ose fesoasoani mo alo ma fanau oloo afaina i soligatulafono ua solofa ai le vatapuia ma mātua aemaise o aiga.

Na faaalia le agaga fiafia ole West Justice ma ta’utino ai ole a amataina la latou lagolago ma le fesoasoani e ala ise ofisa mo faatalanoaga e ono amataina ile masina o lumanai nei poo Me foi, ona faasolosolo ai lava lea ona galulue faatasi ma tagata Pasefika, ma finau foi mo tagata Pasefika tusa lava pe oo i faamasinoga.

Ole isi laasaga i tua atu, ole savalia lea ele faalapotopotoga ma ta’ita’i le aotelega o tagata mai motu eseese ma faalautele iai la latou fesoasoani.

O lagona ole olioli na momoli ai se faafetai tele ile alii pule ma le auaunaga, ona ose faamāmā avega ua ofoina mo tagata Pasefika.