Ua faamalumalu mai e pei o se aitu i luga o le aoa se finagalo o le Kapeneta mo sana faaiuga e faasaga i le lipoti ma le fautuaga ua tuuina atu i ai e le Komisi e pulea tagata faigaluega a le Malo le PSC, i le taunuuga o sailiiliga ma suesuega faasaga i ni tuua‘iga o ni gaioiga solitulafono ua faatutu i le Komesina o faigapalota le susuga Papalii Malietau Malietoa.
O se feiloaiga ma le Pule Sili o le PSC (Public Service Commission) afioga Naea Neth Onesemo Tuilaepa, na ia faaalia ai ua i aao nei o le Kapeneta le lipoti ua iai ma fautuaga.
O ni molimau ua latou faailoa mai e faapea, o se tasi o tuua‘iga sa suesueina e le komisi, o le faia lea o ni gaioiga faamalosi i ni faamaumauga o pepa o totogi o alauni mo le Komesina o faigapalota lea ua ta‘ua e ia lava molimau, na toe suia ai le aofaiga o se seleni e maua e le Komesina poo alauni mo ni malaga i fonotaga i fafo.
O le faia o le suiga i le aofaiga o le seleni na toe faaopoopo ai le tupe e maua. Na faamaonia mai e le Pule Sili o le PSC e sa‘o o se isi lea o tuua‘iga ae e lē mafai lava ona ia faailoa mai pe o le ā se taunuuga o suesuega a le komisi. O le vaiaso nei e tatau ona faailoa ai se faaiuga a le Kapeneta ae o loo faaauau pea ona faamalolo lē tumau le Komesina o faigapalota.
I le suesuega na faia i le Pule Sili o le Matagaluega o Faamasinoga ma Mataupu tau Faamasinoga, o lea foi ua iai se isi tuua‘iga fou ua silasila i ai le komisi e pulea tagata faigaluega a le Malo.
Ua faailoa mai e le Pule Sili o le PSC ua oo atu se mataupu e faasino i se gaioiga na faamalosi ai ona saini e le Pule Sili le tofa Masinalupe Tusipa Masinalupe, le tuuina o le suafa o se tasi o faamasino tamaitai, le afioga Taofimalo Leilani Tuala, i se pepa o faamaumauga a le faamasinoga i le tautua tau i le vaetamaina o tagata.
O se tasi lenei o mataupu sa lipotia muamua atu e le tatou nusipepa i lana lomiga o le vaiaso ua mavae. O lea ua faailoa ai le suafa o lē na tuua‘ia ma le suafa o le faamasino i le tatou lomiga lenei ona ua maua le avanoa e fesiligia ai le Pule Sili o le PSC.
Ua faaalia ai e Naea Beth Onesemo Tuilaepa, ua suesueina e le komisi le mataupu, ona o popolega ma atugaluga i le afaina o le tulaga o le tiute o le ofisa o le faamasinoga i le faia o le amiotonu.
O le suesuega lea e ese mai le sailiiliga muamua a le komisi na faia faasaga i ni tuua‘iga mai nisi o le atunuu faasaga i le faatinoga o tiute ma galuega a le Pule Sili o Faamasinoga lea sa faamalolo lē tumau ai. O se finagalo o le pule sili i se lipoti a le nusipepa o le Observer o loo ia faamaonia ai lona tusilimaina o le suafa o le faamasino i le pepa, ae e lē o o le saini a le faamasino na ia faia.
O nai vaiaso e lei mamao atu na toe foi ai le tofa Masinalupe Tusipa Masinalupe i ona tiute, peitai o loo faatalitali i se faaiuga a le Kapeneta i le fautuaga a le komisi e tusa ma a latou sailiiliga. O le suesuega fou ua faia nei e lē o iloa poo le ā le umi, ae na faaalia e le Pule Sili o le PSC poo le komisi e pulea tagata faigaluega a le Malo, e lē tatau ona umi.
