E fai o le tomai faaleoleo lava ia ua lava sauni i ai alii ma tamaitai ua ta‘ua o Malu o le Malo i Samoa nei, ae ua iai isi tomai faaopoopo i le itu tau i le leoleoga taitoatasi ua mafai nei ona maua e le toatele o leoleo ua filifilia auā lava le alo atu ai i taligamalo o le SIDS, le fono mo atumotu laiti tau atiae o le lalolagi lea e faia mai i Samoa i le isi tolu vaiaso o lumanai nei.
O le puipuiga lava le faamuamua o loo ave i lenei fono tele ma ua au masinā o faatino galuega sauniuni a le matagaluega o Leoleo auā le tali atu i soo se luitau lava e ono tulai mai ona o le fono tele lenei a le lalolagi. Ae o le aoga lea na faagasolo mai i le vaiaso na tea nei ua patino i leoleo ia o le a filifilia e feoai faatasi ma i latou ua faauluulu i ai atunuu o le a auai.
O galuega nei e vaaia i fafo e faia e kamupani o leoleo faapitoa poo Security companies peitai e lē o iai ni kamupani e maua ni tomai faapitoa faapenei, ma o le mafuaaga lea o le agai mai i leoleo e faatino lenei galuega.
O leoleo Samoa foi ua maua lenei aoaoga sa masani ona ave i Niu Sila ma Ausetalia mo le maua mai o lenei tomai, ae o le taimi muamua lenei ua agai mai ai Leoleo faapitoa a Ausetalia e faatautaia lenei aoaoga mo se numera toatele ona o le manaoga o le SIDS. O le aoaoga lenei e aofia ai le tomai i le sailiga o pomu e ono tatao i Falefono, faletalimalo atoa ai taavale e feoai ai sui usufono. E lē gata i lea o le iai i taimi uma i soo se nofoaga e feoai ai sui nei o malo ua faapea ona valaaulia mo lenei fonotaga.
O le aoaoga e to‘a 50 alii ma tamaitai ua mae‘a ona aooga ai i atunuu mamao ua toe faamanatu i ai lenei tomai ma le isi to‘a 50 o alii ma tamaitai leoleo o lea faatoa agai lea e faatino lenei aoaoga.
O le faamoemoe lava ina ia mafai ona maua e leoleo Samoa le tomai e puipui ai tagata nei ua aumai lo latou faatuatuaga o lo latou saogalemu i leoleo o Samoa, ma o se faamanatu foi lea a le alii Sui Komesina o Leoleo, Fauono Talalelei Fatu ina ua tatala aloaia lenei taumafaiga.
O le faamanatu ina ia mafai ona puipui ma ia saogalemu taualumaga uma o lenei fono tele.
