Faamalosia tomai faatekonolosi mo le faamāmā avega i galuega

O le fetufaa‘i i le faalauteleina o le alualu i luma o le faaaogāina o tulaga faatekonolosi, e fesoasoani ai e faafaigofie auaunaga a le Malo, o le sini autū lea o se fonotaga a le Electronic Government poo fesootaiga faatekonolosi e faaaogā ia auaunaga a le Malo, na faatautaia i le Tanoa Tusitala.

O le faaaogāina o tomai faakomepiuta ma fesootaiga tau satelite, o se suiga lea ua aofia ai le tele o le soifua a‘oa‘oina ma soifua faigaluega o tagata o le atunuu.
O ni tomai ua amata ona faafaigofieina ona o le tomai ua i fanau a le atunuu. Peitai e tele lava vaega ua moomia le a‘oa‘oina faalauaitele ai le atunuu i nei fesootaiga ma tomai faatekonolosi.

O le unai lava ia faigofie ona faatino auaunaga aemaise lava i Ofisa o le Malo ma ana Faalapotopotoga mo atina‘e o le atunuu.

O lenei fonotaga na faatautaia i le vaiaso na se‘i mavae atu nei, na maua ai le avanoa e faatalatalanoa ai le sui o le faalapotopotoga o atina‘e a atumotu o le Pasefika, le SPC i Fiti, ae o se alo o Samoa, Falanaipupu Dan Aiafi, i se faamalamalamaga o nei ituaiga fonotaga, auā o le toatele o le atunuu ua na ona maimoaina lava o le tele o fono faapenei e aunoa ma le atoaga o le malamalama i lona aogā.

E fiu lava foi la taumafaiga ua mavae a le Malo e unai ai fesootaiga nei i tua i nuu, ae uma ane lava na o le faaaogāina lava o le telefoni e matele ai tagata lautele ae o le fia a‘oa‘oina i masini computers ua faapea ona faamautu i komiti tumamā, e leai ma se isi e umi se manaoga e faatino ia a‘oa‘oga.

O le tele foi la o nofoaga nei, a lē mataala tina o loo vaaia, e mae‘a ane lava ua toe tapunia ma maumau ai taumafaiga e faatino nei fesootaiga faatekonolosi i tua i nuu e mamao ese ma le taulaga.

O le faamatalaga a Falanaipupu – e tele ofisa o le malo, kamupani tumaoti ma isi auaunaga ua faaaogā i Samoa fesootaiga televavave, faapena foi i isi motu tuaoi, ae o le faaaogā la o tomai nei e ofo atu ai nisi fesoasoani i le toeaina ma le loomatua i nuu i tua, o le auga tonu lea o le fono faaleaoaoga a le Pasefika na usuia i Samoa.
“Ua taugata le soifuaga ma ua moomia e o tatou tagata le faamāmā avega, ma o le faaaogāina o nei auaunaga o le a faafaigofie ai mea uma.

O se faataitaiga faigofie, afai o loo faasalalau se avanoa faigaluega a se Matagaluega a le Malo i Upolu, e lē toe tau malaga mai i latou mai Savaii e avatu se pepa faatumu e talosaga ai mo lea avanoa faigaluega.

Ae e mafai ona talosaga sa‘o e ala i le faaaogāina o auala faatekonolosi faaonaponei”, o le saunoaga lea a le Afioga Falanaipupu Dan Aiafi.
E faapena foi i le sailiga o nisi o faamaumauga e moomia a aiga ma suesuega faaleaoaoga.

Sa tele ina faaaogā faletusi lea lava e vaaia i lenei vaitau, ae o le tele lava o meaaoga a fanau ua tumutumu nei i nofoaga o fesootaiga tau initaneti i soo se vaega o le taulaga o Apia poo Salelologa. Ae o loo iai foi nofoaga ia e ta‘ua o Fesootai Centres ua mafai ona faaaogā i itumalo taitasi o Apia. O se atina‘e tele lea a le Malo ua faaaogāina nei e le toatele ae o loo tau faataitai lava isi.

Ta‘ua e Falanaipupu e silia ma le 20 atunuu o loo i lalo o lenei polokalame ma o loo fesoasoani tele Ausetalia i le faatupeina o se vaega o lenei poloketi.

“E pei ona silafia e le atunuu le cable poo le uaea lea o loo ta‘i mai i le eleele mai Amerika Samoa, e fai si taugata tele ma e ui ina vave le faaaogāina o lenei auaunaga i lea motu tuaoi, ae o loo naunau le malo ina ia faalautele le iloa o tagata i le faaaogāina o nei auaunaga, ma o se itu o le a faafaigofie ai auaunaga lautele a le Malo”, o le toe faaopoopo mai lea a Falanaipupu.

I lea lava faatalatalanoaga na ta‘ua ai e lea sui, e tele ni tulafono o loo galulue ai e puipuia ai le faaaogāina o nei auaunaga, ma o se atina‘e foi o le a tele se tupe a le Malo e faaalu ai ona o le manatu i le lelei lautele o Samoa.

“E telē le sao o le Malo i le unaia o lenei taumafaiga e ala i le faamalosia o Matagaluega uma a le Malo e fausia ni a latou upega o fesootaiga poo Websites e mafai ai e le tele o tagata ona fesootai ma iloa mea o loo tutupu i se auala vave”, o lana toe faaopoopo mai lea.

Faaalia foi e Falanaipupu, e lē o se itu e faaitiitia ai galuega a nisi o i latou o loo nafa ma le faia o galuega tusitusi poo nisi itu, ae o se auala o le a faafaigofie ai mo le mamalu lautele o le atunuu.

E pei foi ona ta‘ua e le Alii Palemia o Samoa ina ua amata faatutū Fesootai Centers i Itumalo, o le a lē toe tau malaga mai i Apia le toeaina ma le loomatua e fia fesootai ai i fanau i fafo. O le a lē toe tau saili le faatinoga o tala o Faamasinoga i ofisa o Apia – ae o le a mafai ona faia uma i afioaga i tua.

Telē le faamāmā avega e ala i tupe mo feoaiga ae o le a laitiiti atu foi le tupe alu i le faaaogāina o masini auā e totogi sina seleni i tina o Komiti o loo vaaia ia nofoaga ma taumafai ai e totogi le pili o le eletise ma fesootaiga tau initaneti.

O loo maua foi se latou fesoasoani i tupe ao i tifaga e mafai ona faaaogā ai projectors ua avatu i Fesootai Centers uma, ma ua toatele lava tina ua latou faaaogāina mo tifaga e totogi ai le ulufale. O nisi ia o auala ua faaaogā auā le faatupega o nei nofoaga.

E ese la le atina‘e lea a le Malo ma taumafaiga o le fono o le vaiaso na tea nei, auā o Ausetalia lea ua fesoasoani mai i le unai lenei ua tele foi ina taulai i ofisa o le Malo. O le Faletupe o le lalolagi lea e galulue ma le Malo i Fesootai Centers.