O tiute masani o tina nofotane i totonu ole aiga oloo mau paolo ai poo le aiga o lana tane poo lona toalua e le o taumafai le polokalame ale Toomaga mo ē Puapuagatia e suia.
Ole mau ale faletua o Anarosa Molioo e le ole auga lea ole latou taumafaiga e faatalanoa le tāua ole tina nofotane i se aiga ma se nuu ae ole sini ole faamoemoe ia mafai ona ausia le tulaga tutusa o tina ole nuu ma se aiga ma le tina oloo mau paolo ise aiga ole nuu.
E iai le talitonuga o faafitauli oloo feagai ma tina nofotane e tusa o tu masani a Samoa e faasino esea, o lona tiute ole umukuka, ose auauna e fai uma iai feau ale aiga ose itu lea oloo naunau e faamalamalama ma faailoa ai ile atunuu ole fafine nofotane ole isi foi tagata soifua o pele a isi ae le oni pologa.
Ole vaiaso ua mavae sa faatino ai ele Toomaga mo ē Puapuagatia le latou polokalame faalauiloa i soo se vaega ole taulaga o Apia, sa tala‘i atu ai le tāua ole tulaga tutusa o ituaiga o tagata poo le gender balance ose autu oloo unaia malosi ele lala o Malo Aufaatasi le UNDP.
E ‘afa miliona pe lima selau afe se vaegatupe mai le UNDP ua tuu atu i aao ole Toomaga e faia ai le polokalame. E pei ona silafia ole faamoemoe lenei ua maea ona faatino se tasi o vaega sa ave ai le mataupu e faatalatalanoa i totonu o nuu ma afioaga. O sui o lenei polokalame aemaise le itupa o tamā na latou faaalia le tāua tele.
“O a‘u o lo‘u saua ia i lo‘u toalua auā ma te nonofo i lou aiga ae ina ua alu atu le polokalame lenei sa tele se isi o‘u iloa na maua ai ma ou faapea ai loa e sese tele le mea lea oute faia i lo‘u toalua”.
Ose tasi tamā ole polokalame na ia faailoa ile autusitala o tina nofotane o lo latou nuu ua faamoemoeina tele e matai ile tele o meafai a lo latou nuu aemaise o lo latou sao ile atinaeina o fanau.
“Ua galulue faatasi ma tina o lo matou nuu ma ua avea le polokalame lenei ua seāseā o ta faalogo atu o tusitusi lima tina ma teine ole nuu a mea ole fafine nofotane o lana galuega lea e fai, ua femalamalama ai ile tāua ole tutusa ole faiga o tagata uma”.
Faaalia ele Pelesetene ole Toomaga le faletua o Siliniu Lina Chang, ole tāua ole polokalame ua mafai ona faia ai se sao ole faalapotopotoga e fesoasoani e aoaoina mafaufau o tagata aemaise lava le lio o faiganuu e pei ole lotoifale lea oloo tutupu ai nisi o faafitauli e aafia tele ai le siosiomaga o tina nofotane i aiga Samoa.
