O se tamaitai e galue i le Faalapotopotoga o le Soifua Maloloina a le lalolagi le WHO na faapea ona malaga asiasi mai i Samoa ma lona toalua ma agai i le motu tele i Salafai. O ia lea na iai masalosaloga o loo tauave le faama‘i matautia o le Ebola, ma na faapea ona taofia i le falema‘i tele i Motootua mo se vaiaso a o tau fai i ai suesuega pe faamaonia o loo feaveaia le faama‘i o le Ebola.
O le lipoti na faapea ona oo mai o lea tamaitai sa galue i Guinea, se tasi o atunuu o Aferika i Sisifo o loo aafia ona tagata i le faama‘i matautia lenei. O le suesuega na maua ai e lē faamaonia masalosaloga ma ua toe faafoi nei lea tamaitai i Ausetalia ae faalauiloa loa ma lapataiga a le Matagaluega o le Soifua Maloloina i le faaiuga o le vaiaso na tea nei.
O lea fautuaga na faapea mai i le gagana Peretania e tatau lava i tagata uma o Samoa ona usitaia pea lapataiga ua mae‘a faalauiloa i le faagasolo mai ai o le tausaga. Ia faamalosia pea le siaki pe afai o lea e iai se fesootaiga o se tasi o le atunuu ma ni tagata mai i Aferika i Sisifo ma atunuu e pei o Guinea, Liberia ma Sierra Leone.Ua faapea mai foi ua faamalosia nei puipuiga i tuaoi o Samoa e ala i malaevaalele faapea ai uafu ma e ui o lea e laitiiti le avanoa e ono aafia ai se tagata Samoa i lenei faama‘i e tatau lava ona mataala tagata uma aemaise foi nisi o le atunuu ua malaga atu i lea itu o loo maua ai pea i latou i lenei gasegase. Ona pau lea o le faamatalaga ua maua mai i le soifua maloloina ma o loo tuufesili foi lava tusitala pe aisea ua faia ai lenei faasilasilaga i le gagana Peretania ae e leai se lapataiga ua sau i le gagana Samoa o lenei faafitauli ae o tagatānuu o Samoa e matuā telē le aafiaga pe afai e sao mai lenei ituaiga faama‘i i totonu o le atunuu.
E lē o iai ma se faamatalaga o aumai poo le ā le siama na maua ai lenei tamaitai ae o le itu lea e lē o aafia lona toalua aemaise foi nisi na fesootai i ai i le malaga mai i Samoa o lenei tamaitai lea ua faamautu ai e lē o le Ebola na maua ai o ia.
O le vaiaso atoa na taatia ai lenei tamaitai i se potu na aveese lava mai i isi gasegase tigaina o le falemai tele i Motootua a o tau fai i ai suesuega.
Sa iai foi se masalosaloga faapea ae e lei faalauiloaina foi, i se tamaitai talavou ua maliu talu ona taofia ai i le falemai tele i Motootua ae na faamautu mai foi, e lē o le Ebola le mafuaaga o lona gasegase peitai e maliu lava foi lenei tamaitai e lei manino mai lava le Soifua Maloloina poo le ā tonu lava le gasegase na aafia ai sia alo tamaitai o le atunuu.
O lea na maliu foi sana uo tamaitai mulimuli ane ae e lei iai se fesootaiga ma le gasegase lenei na laga ai.
O le popolega lava o le atunuu o le tulai mai o se tasi ua maua sa‘o i le gasegase ae afai e faatali seia mae‘a lelei lava suesuega ae lē lapataia le atunuu, e ono telē se faafitauli e tulai mai ai i le lumanai, ae o le faafetai o le tulaga lea e lei faamaonia lea gasegase ma ua toe faafoi lea tamaitai i lona atunuu na malaga mai ai ma lona toalua.
