O se tu ma se aga masani ile atunuu talu mai tausaga ua mavae le fafaga e fanau o le au fai suega pe a oo i taimi o suega autu a aoga uma a le Malo lea e sue ai foi ma fanau o loo aooga i aoga a ekalesia ma aoga tumaoti.
O le suega ua maea nei mo fanau ile vasega tausaga valu ma le suega mo vasega o le tausaga fa ma le ono ile sailia o le tulaga ua iai le malamalama o fanau iti i aoga tulaga lua ile sipelaina o upu ile gagana Samoa ma le gagana peletania, na alu atu ai se faasalalauga mai le matagaluega o aoga a le Malo ina ia taofia le toe faia oni fafaga mo le au fai suega.
Peitai e iai aoga e lua a le Malo i afioaga o Samalaeulu ma Puapua i Savaii sa faia lava fafaga ona ose finagalo o matai o nuu e ana ia aoga tulaga lua.
Ua faatonuina nei e le matagaluega o aoga taaaloga ma aganuu sui o komiti o ia nuu ia oo atu mo se faamatalaga ile pogai o le le logosaia o le faasilasilaga faalauaitele e taofi ona toe faia ni saoga meaai e fafaga ai le au fai suega.
Ua faaalia e le matagaluega o aoga ua iai alauni ua ave i faiaoga o loo agai e faia suega a le fanau ua lava ma totoe lea e faatau ai ni taumafa moi latou.
E pei ona silafia e le atunuu o tausaga ua mavae sa sasao ai i fanau ose aoga taumafa eseese mo le faia o lea tulaga.
Sa vaaia ai le lau atu o le tele o taumafa ma e le gata ina tausasami le au fai suega, ae a uma ona foi lea ma taitai o ato taumafa.
