Ua iai nei se faalauiloa mai i le Matagaluega o Mataupu tau tina ma tamaitai, atina‘e o nuu ma aga fesootai ina ia faamalosia le fua o le Ie Samoa, ma ua talosagaina falelalalaga i le atunuu e taofi le toe lalagaina o isi ietoga, e pei ona tatala ai lava le fua i soo se umi o ia measina a le atunuu.
O le amata mai o le Ie Samoa i le vaitaimi o le 1991 agai mai ai i lenei vaitaimi, sa taumafai ai le Malo e ala i le Matagaluega o Tina ma Tamaitai ina ia iai se fua e ta gatusa ai le lalagaina o le ie lenei. Ua iai la le fua faataatia peitai e lei faamalosia lava le tele o le ie se‘i vaganā ai le ninii ua vaaia nei le tele o ie ua lalagaina ua tutusa lelei lea itu o le gaosiga o le Ie Samoa. O le vaiaso la na tea nei na faaalia ai e le Minisita o le Matagaluega, le Afioga Tolofuaivalelei Falemoe Leiataua, o se tasi lenei o vaega o le faamanatuga o le 50 o tausaga o le tutoatasi o Samoa, o le vaavaai i le faamautu ai o lenei measina a le atunuu ma ua talosaga ai falelalaga uma o Samoa ina ia utagia le talosaga e lalaga lava na o le Ie Samoa, atoa ai ma le gaosiga o le siapo i lenei tausaga, ae taofi isi ie tetele e pei ona ua agai lava le tele o falelalaga e faaopooopo i le Ie Samoa.
O le faamatalaga a le Afioga Tolofuaivalelei, a mafai e le mamalu o matuauu ma le au seepapa ona taofi le toe lalaga o isi ie tetele, o le a faigofie ona unai le Ie Samoa auā le faaaogāina i faalavelave uma ma taumafai ai e faamautu le faamāmā avega lea e agai i ai le Matagaluega ina ia faamalosia.
Ua iai nisi ua lāgā le lē fiafia i lenei faaasilasilaga ona o le manatu, o le aveese o isi fua o le Ie Samoa o le a taofiofi ai foi le saolotoga o le tagata lalaga lava ia i le fua e manao i ai mo ie auā faalavelave.
O loo toatele lava e iai le manatu o le tetele o ie o le tāua foi lea, ae o le manatu o le Malo e lē tau tulia i se Ie tele ae o le matagofie o le Ie Samoa ona ua lē soona telē tele ae o le lalagaina e matuā ninii lava e mautinoa le matagofie pe a mae‘a ona lalaga.
E leai ni tulafono e mātau ai poo le ā le tetele o ie o le a lalaga ae ua na ona talosaga lava o le Malo ma o sui o le Malo i falelalaga ma Komiti a Tina ma Tamaitai i le atunuu ua fesootai pea ma le Malo i le taumafaiga e pei ona faalauiloa nei. O lea o loo gasolo lava sui o le Matagaluega ina ia asiasia falelalaga i totonu o afioaga taitasi auā le talosagaina pea o le fua lea a le Malo.
O lea foi ua amata le tausaga ae ua gasolo pea sui o le Matagaluega ina ia faatino lenei taumafaiga aemaise o le manatu e iai se masina o le tausaga lenei o le a faalele ai le tele o nei galuega o loo faia i le taimi lenei. O le toe foi mai o le Ie Samoa i le atunuu ua vaaia ai le toe faamalosia foi o falelalaga ma le taumafaiga ina ia faamalosiau i tamaitai o le atunuu e lalaga mai le ie lenei.
O le taumafaiga lava ina ia laititi ie e agai ma aiga e faatino ai faalavelave ae ia ave ie ua ta‘ua o measina i ia faalavelave.
O loo iai lava foi le unai ina ia mautinoa e laiti Ie o le Malo e faaaogā i taimi o faalavelave o aiga, nuu ma ekalesia.
E iloa lava la i asiasiga nei o loo faagasolo pe o le a tapu le toe lalagaina o ni ie tetele e pei ona vaaia i lenei vaitaimi i faalavelave.
O lea ua lē toe vaaia lava ietoga laiti poo lalaga i le atunuu ona ua taofi le toe lalagaina, ma o ie tetele atu ia ua aumai nei le fautuaga ina ia taofia ma o le a mātau lelei pe taunuu lea faamoemoe o le Malo.
