Faamalosia avanoa mo fanau e tapueina le tāua le malamalama i le Aganuu

E lua aso na faagasolo ai le polokalame o le faatinoga o le aganuu i tu ma aga masani i totonu o faiganuu i alalafaga i Samoa.

O se tofa na a‘e i susuga i taitai o le Uarota Redoubt Stake i Manukau, ona o le lagona e fia faailoa ma aoaoina pea alo ma fanau talavou o le aulotu i tupulaga o le lumanai ina ia o latou silafia ma malamalama lelei i le faatinoga o nisi vaega o le soifuaga i le aganuu e pei o le sulatoga, folafolaga o ni sua, o le faatau aemaise o le faatinoga o le ava o le feiloaiga.

O le faamoemoe tāua ia mafai ona faaauauaina pea le sootaga o tupulaga e faatumaina ai lo latou loto atunuu e ala i le malamalama i le faatinoga o vaega tau o le aganuu sa soifua mai ai tuaa i totonu o Samoa.
Na maofa le maitau ma le silasila a le auvalaaulia auā sa matuā faatumulia le maota o le Uarota i le paia ma le mamalu o ē na valaaulia e suilotu o le Ekalesia.

Na faaalia e se tasi o fesoasoani lo latou agaga fiafia tele ma le loto mitamita e tusa ma le faafofoga ma le maitau i fanau talavou ma lo latou faatinoga o vaega uma e pei ona sa tapenaina e le komiti faapitoa mo le faataunuuina o le faamoemoe o tupulaga.

O se avanoa lelei tele lea ua faagaganaina ai fanau i le faaaogāina o le gagana faamatai, aemaise foi o le faaaogāina o fanau e fai ma matai ile nofoaiga o le faatinoga o le ava o le feiloaiga a nuu. O le alalafaga o Sapapalii ma Faleapuna na faaaogāina mo le faatinoga o le ava, ma sa matuā mataina foi le manino lelei ma le toa lelei i le lototele o i latou uma na saunoa mo le faatau aua na logomalie a latou saunoaga.

Na ta‘ua e se sui o le Uarota ua leva ona sauniuni ma tapena lelei fanau auā lenei faamoemoe tāua, ma o se mitamitaga sili foi lea i mātua ona o avanoa lelei ua maua e nei fanau latou te faatinoina ai le polokalame e pei ona sa fuafuaina. Na saunia se tasi o le tupulaga ma na faaalia ai lona fiafia tele aemaise ona ua ia faatinoina ma lona talitonuga o se aganuu manaia ma matagofie le aganuu a Samoa, pe a malamalama lelei i ai.

Na mae‘a le faamoemoe i vaega uma ona faaiu lea o le polokalame i le saunoaga a le Susuga i le Epikopo o le Uarota Redoubt Stake, le Susuga Epikopo Moseniatu Fonoti Sioli na ia faafetaia ai galuega mae‘ae‘a a le komiti mo le faatonutonuina o fanau mo la latou faatinoga.

Na ia faafetaia le tupulaga talavou ma lona loto fiafia tele ma le faagaeetia ona o a latou faatinoga matagofie aemaise o lo latou malamalama i le aganuu ua mafai ona faalauteleina atili e tusa ma le polokalame matagofie.

Ua iai le faamoemoe o le a toe tapenaina lelei foi se isi polokalame faapea mo le tausaga fou auā lava le faaauauina pea o avanoa mo le toe tepa i aganuu masani a Samoa aemaise ina ia tapueina atili ai pea le fiafia ma le malamalama o tupulaga talavou Samoa i totonu o Aoteaoa nei.
Komiti na faafoeina le polokalame mo tupulaga

Nisi o le tupulaga talavou na faatinoina le polokalame

 (L-R) Fesoasoani Robert Smith, Pres. Hans Key, Epikopo Moseniatu Fonoti Sioli, Fesoasoani Galumalemana Eneata A. Frost o le Uarota Redoubt