E ese le taumafaiga ua vaaia nei i le matagaluega o Leoleo ina ia mafai e leoleo uma i Samoa ona tali atu i soo se faalavelave faafuasei aemaise i le tomai e toe faaola ai se tagata ua lē mānava. O se faiga ua unai i le mae‘a ai o se faalavelave na maliliu ai tagata e toatolu i gataifale o Mulinuu i le aso 26 o Tesema i faiga malologa ua mae‘a atu nei.
Faaalia e le Komesina o Leoleo le faateia ina ua tulai mai lenei faalavelave ae matauina ai le toatele o leoleo na agai e laveai i latou na malelemo, e lē o iai le tomai e mafai ai ona laveai tagata nei ma na molimauina i ata na tapue o lea faalavelave, le tau toe faaola mai o nei leoleo e nisi na faapea ona agai atu mo le fesoasoani.
O le vaiaso na tea nei na valaauina ai le aufaigaluega a le Koluse Mumu ina ia ofo atu aoaoga nei mo Malu uma o le Malo ma le faamatalaga a le Komesina o Leoleo ia Egon Keil, e tatau ona iloa uma e leoleo lenei tomai auā e lē iloa lava taimi e tulai mai ai faalavelave faafuasei ae o loo iloa e leoleo tali atu i ai.
Sa ta‘ua e le Koluse Mumu, e lē fou le taumafaiga lenei ma na iai foi aoaoga na faia i tausaga ua mavae mo sui lava o le Matagaluea o Leoleo.
Ae na faaalia e Lelevaga Fouina, o le Komesina o le Tineimu ma Tali o Faalavelave Faafuasei, o le latou ofisa ua faatulafonoina e tatau ona avea ma fesootaiga muamua lava o faalavelave faapea ae o le faaletonu o fesootaiga na mafua ai lava ona tuai le tali atu a le latou Ofisa i le faalavelave lea na maliu ai se tina ma sona atalii faapea ai se isi alii i le sami i Mulinuu.
E silia ma le itula talu ona tulai mai le faalavelave ae faatoa logotala le Ofisa lea i le faalavelave ma na agai atu ua ave isi tagata na laveaia mai ma le toalua matutua na maliliu i le falemai i Motootua ae o loo totoe ai le tamaititi e valu tausaga lea foi na maliu o loo tau saili, ma o gatai atu o Mulinuu i Vaiusu lea na maua ai le tino o le tamaitiiti lenei.
Ta‘ua e le Komesina o le Tineimu ma le Tali o Faalavelave Faafuasei, e toatele lava le atunuu e manatu e na o le taimi lava o mu ma le sosolo o afi e valaau atu ai le latou ofisa, ae o le galuega laveai ua patino tonu lava i le latou ofisa.
Faaalia e Lelevaga, o le tulafono e tatau ona iloa uma lava e tagata o lana aufaigaluega le tomai lea e faamānava ai soo se tasi e maua atu i faalavelave ua lē mafai ona mānava pe ua aafia foi le fatu ma o le tomai lea ua aoaoina nei i Leoleo.
Ta‘ua e Lelevaga, o loo iai foi tuutuuga o le felogoai o matagaluega e lua o leoleo faapea ai le Tineimu ma Tali o Faalavelave Faafuasei i mataupu faapea ae ua lē iloa pe aisea na tuai ai lea tulaga.
O lana fautuaga i le atunuu, e manatua o le latou ofisa le isi auaunaga e tatau ona logo i taimi o faalavelave faapea ae e manino o Leoleo lava e tapa i ai le atunuu i soo se ituaiga faalavelave lava e tulai mai.
