Ua alu le vaiaso ua tuanai o agai atu aoga eseese o le atunuu i ni mafutaga na faia i le lotoā o le ofisa o le tineimu ma le ofisa o leoleo i Tauese, lea na faagasolo ai faalauiloa a le Matagaluega o Leoleo i le unaiga o le saogalemu o fanau mai i fesootaiga faatekonolosi.
Ua tele faafitauli ua tulai mai aemaise i le va o aoga ona o le felafoai o faamatalaga tau faamata‘u ma faamatalaga faifai e isi taimaiti aoga i isi. O lea lava foi na ta‘ua e le Ofisa o Leoleo, o le tele o vevesi e tulai mai i masina ua tuanai i le va o aoga maualuluga i le atunuu ua maua nei ua mafua lava ona o fesootaiga nei.
O aoaoga la sa faatautaia i faalauiloa o le vaiaso na tea nei na faamalamalama ai e leoleo i fanau aoga, o fesootaiga tau faamata‘u ma le taufaafefe o ni solitulafono e pei foi ona taofia ai se tama o le Kolisi o Avele, ona o le lafo o upu tau faamata‘u ma fuafua ai se osofaiga i le Kolisi o Maluafou i le masina na tea nei.
O loo taofia pea lea taulealea i le falepuipui e faatali ai le toe tulai i luma o le faamasinoga e tali i lenei moliaga.
Faaalia e le Komesina o Leoleo i lea faalauiloa, le tāua o fesootaiga faaonapo nei ua maua i Samoa aemaise lava i le faatinoga o galuega a ofisa eseese faapea ai ma meaaoga a le fanau, peitai ua toatele ua sese le faaaogāina o nei fesootaiga ma ua mafua ai nei le taumafaiga ina ia faia lapataiga o le fanau.
O le lima ai lenei o tausaga talu ona unai i Samoa le faamanatuga o lenei polokalame, ma ua oo atu i le 20 atunuu ua latou faatāuaina.
O se tasi o soligatulafono ua iai nisi ua falepuipui ai, iai soifua ua maimau ai. Ta‘ua e Fuiavailiili Egon Keil, e silia i le to‘a 50 fanau aoga ua falepuipui ona o vevesi e afua mai i le faaaogāina o telefoni, ae lata i le to‘a 80 i latou na taofia ma fesiligia i le aafia i mataupu faapea. Mo le kamupani telefoni o le Digicel ua iai se faiga o lea aiaia ai le faatauina o telefoni feaveai i fanau aoga ma ua aofia ai le matuā faatapulaa e faasāina ai se tama poo se teine e i lalo ifo o le 18 tausaga ona toe faatau se telefoni ma e moomia pepa faamaonia o le tupulaga talavou e faatau ai se telefon feaveai.
E le gata i lea, seiloga lava ua iai le maliega a matua ona faato‘a faataga lea ona faatau atu ni telefoni i fanau.
O aoga i totonu o Samoa ua matuā faasā a lava le iai o telefoni feaveai i fanau i taimi o le aoga. O le faamanatu a le matagaluega e oo atu i le 5 tausaga i le toese le faasalaga e ono faasala ai soo se tasi e faamaonia lona faia lea o soligatulafono faaaogā ai upega tafailagi.
Faamanatu mai e leoleo o soo se tusitusiga lava e faia i le facebook poo soo se isi lava tuatusi i upega tafailagi ua mataituina uma, ma e tusa lava pe tape ese e le tagata ua faia lea solitulafono e maua lava i faamaumauga.
