O le faaiuga na sau sa‘o lava i le Taitai o le Malo
Ua faamautu mai i se faaaliga faalauaitele a le Malo e ala i le Ofisa o Faamatalaga le faaiuga a le Kapeneta a Samoa lea ua faamalolo ai nei nisi o le Pulega a le Malosiaga tau Eletise.
O le alii Ofisa Sili, o Muaausa Joseph Walter, le alii sa faapea ona tulai mai i le tofiga o le Pulea o Fefaatauaiga, Lesaisaea Reupena Matafeo ma Aleni Sofara lē sa amata galue o se faufautua faaletulafono ae oo mai i le taimi nei ua avea ma faauluuluga o tagata faigaluega a le EPC.
O le faaiuga na ta‘ua le sau sa‘o lava i le Taitai o le Malo ma na faamautu i se fono a le Komiti o Faatonu a le Malosiaga tau Eletise i le afiafi o le Aso Tofi. Ae o le afiafi o le Aso Faraile (taimi Samoa) lea na faamautu ai loa lea lava faaiuga i se fono a le Kapeneta.
Ua silia ma le lua vaiaso o faalauiloa ni tusitusiga e faatatau i faaiugafai a le Pulega o lenei Faalapotopotoga Tumaoti a le Malo. Na amata lāgā lava lenei mataupu i se faaseā a se tamaitai na manatu o ia sa tatau ona filifilia i se tasi o tofiga a le Vaega o Pulega.
O lana tusi atoa e faaali ai lona faagaulemalie na lomia i le Samoa Observer i le lua vaiaso talu ai. I lea tusi na tuuaia ai e lenei tamaitai le maua e se alii loia o Aleni Sofara o se tasi na galue o se faufautua faaletulafono i le EPC o lona avanoa.
A o lei lāgā le faaseā a lea tamaitai na iai foi nisi lomiga na fesiligia ai le tofiga o le faufautua faaletulafono poo le loia a le EPC lea foi na maua lipoti o loo umia e lea alii, ae o se tagata ua faamautu mai e le Asosi a Loia a Samoa e lē o lesitalaina lona faailoga faaloia e galue ai i Samoa.
O le tali a le Ofisa Sili o le Malosiaga tau Eletise Muaausa Joseph Walter o loo galue Sofara o se tasi e vaaia tagata faigaluega a lē o se loia faufautua. I le fesiligia ai foi o le Loia Sili Aumua Ming Leung Wai, o se tasi o Faatonu o le Komiti o Faatonu a le EPC, na ia ta‘ua ai o mataupu uma e fesootai ma tamaitai na manatu o ia sa tatau ona filifilia i se tasi o tofiga a le Vaega o Pulega.
O le avanoa e pei ona faitio ai lea tamaitai, o le faauluuluga o tagata faigaluega a le EPC. O se avanoa na ta‘ua e lea tamaitai e lē agavaa ai Sofara ona e lē o iai ni faailoga e fesootai ai ma lea avanoa – o le pulea o tagata faigaluega.
O le faitioga a le tamaitai Patricia Ah Chong Fruean, ona na ave o ia e le EPC e faamae‘a le faailoga o le Masters i le galuega lea o le Pulea o Tagata Faigaluega ma sa iai lona manatu o le foi mai ma lona faailoga, o le a mafai ai loa ona ia maua le tofiga tonu lea ua tofia i ai Sofara.
O le avanoa o le Pulea o Tagata faigaluega, o se avanoa na afuafua mai i le taitaiga a Lesaesaea Reupena Matafeo, o ia lea sa vaaia le atina‘e o le tomai poo a‘oa‘oga i totonu o le Faalapotopotoga a le EPC.
Mulimuli ane ua faasalalau le avanoa o le Pule o Fefaatauaiga a le EPC – Ona see ane lea o Lesaesaea i lea avanoa ae faatalatalanoa ai loa Sofara ma le tamaitai o Patricia Ah Chong Fruean. O le avanoa la lea ua maua e Sofara ma mafua ai ona lāgā le faaseā a le tamaitai e pei ona faalauiloa.
O lona manatu o tuutuuga uma o le maua ai o lenei avanoa na fafau lava e le Pulega a le EPC aemaise ia Lesaisaea ina ia mafai ona maua e Aleni Sofara.
O le tali a le Alii Ofisa Sili o Muaausa Joseph Walter i lenei mataupu ina ua fesiligia e tusitala, o le tagata aupito agavaa lava lea na filifilia i le tofiga atoa ai ma isi ana faamatalaga faaopoopo e faapea, o le faafaigaluega ai o Aleni Sofara, o se vavega poo se faaolatotoga lea mo le Ofisa (miracle). Na ia faaalia ua telē le fesoasoani ina ua galue lea alii i le EPC.
E lei mae‘a ai i lea faitioga lenei mataupu e faatatau lava i alii e toatolu nei o le EPC, o le Ofisa Sili, le Pule o Tagata Faigaluega ma le Pule o Fefaatauaiga aemaise lava i alii mulimuli nei e toalua.
O ni fetusiaiga i totonu lava o le EPC, (memo) na fesiligia ai nisi o gaioiga na faatino e Aleni Sofara e pei o ni vaega tupe o loo talosagaina e fia ave mo afioaga sa iai fesootaiga ma le Faalapotopotoga.E $2000 na talosagaina mo Faleatiu.
O le tupe lea na talosaga ai Aleni Sofara ia Lesaisaea Matafeo ona o se feiloaiga sa faia i le va o le EPC ma le nuu o Faleatiu ma o le taimi tonu a o Sui Pule Lesaisaea i le masina o Mati 2011.
O le masina muamua atu o Fepuari, na talosagaina ai e Aleni Sofara se isi tinoitupe e $2000 mo se feiloaiga a le EPC ma le afioaga o Tanugamanono e faatatau lava i le Eletise. O le isi mataupu o se talosaga mo ni meaalofa tupe e totogi atu i Malu o le Malo o loo galulue faatasi ma le Malosiaga i le polokalame faagasolo i afioaga ua suesueina ai i latou o loo faatogafiti ona fai a latou mita o moli.
O le vaitaimi tonu o le Eseta na faia ai ia talosaga. O loo faamautu ai foi i ia lava tusitusiga le ave o ni tupe i sui o le Matagaluega o Leoleo i lalo lava o lenei polokalame.
E pei o le $250 tala na ave i le Komesina Lagolago o Leiataua ma le isi $250 tala na ave foi faameaalofa ia Ulugia Mata‘u. O isi leoleo e toalua e ta‘i $150 tala na ave i ai.
Ina ua talia e Muaausa Joseph lea talosaga mo alauni a Leoleo sa moomia le saini a Lesaesaea e faamautu ai le faamatuu atu o le alauni. O upu o le talosaga a Sofara, “… e moomia lau saini (million dollar signature – e miliona tala le malosiaga) mo lenei tupe faameaalofa.”
Na faaauau ona lāgā mai lipoti e faatatau lava i gaioiga a sui nei o le Pulega e pei ona iai se latou mafutaga faalea‘oa‘oga na faatautaia i le Tofamamao i Leauvaa.
I fetusiaiga i totonu o le Ofisa na lomia ai se taloaga a Aleni Sofara ia Muaausa Joseph e talosaga ai le totogi atu o ni alauni faapitoa mo le pulega.
O nei alauni e pei ona ta‘ua e Sofara e totogi ai le sailiga o le tofa e fausia ai ni fuafuaga mamao a le Faalapotopotoga. E ese mai lea i o latou totogi o loo maua mai i le Faalapotopotoga.
O se tusi na lāgā ai loa finagalo faagaulemalie o nisi o le atunuu ma faapea mai ai pe aisea ua tau totogi ai alauni faapitoa i galuega sa tatau lava ona faatino e nei sui o le Pulega ma o loo totogi ai latou te faatautaia aemaise ai i lenei vaiataimi o le siisii pea o le tau o le unite o le eletise ma le tau faasoasoa o le mamalu o le atunuu.
O nei fetusiaiga uma i totonu o le Ofisa o loo saini ai Aleni Sofara o ia o le Loia Faufautua, o le Faauluuluga foi o Tagata Faigaluega a le EPC.
O loo faaauau lava ona lagalagā manatu o le atunuu ona o nei faiga ua faalauiloa mai i totonu o le Ofisa o le Malosiaga tau Eletise ae o lea la ua foliga mai ua faatautaia nei le faaiuga a le Malo e faatatau ia i latou nei e pei ona faamalolo ai nei i latou nei e toatolu.
