Ua silia i le toa sefulu leoleo ua faamalolo lē tumau e aofia ai ma nisi ua tetea talu ona tulai mai le susuga Egon Keil e avea ma Komesina fou o le Matagaluega o Leoleo.
O le pine faamau lea o ana saunoaga amata talu ona seei i le nofoa o le faauluuluga o lea matagaluega tāua a le Malo, o le a le ‘alo ana faaiuga i le faia o le amiotonu, ina ia mautali leoleo i soo se taimi e faaletonu ai. O le a lē solomuli foi e faia le faaiuga tonu ma sa‘o pe a iai nisi o leoleo e lē usitaia taiala o le latou galuega aemaise pe a soli le tulafono.
O le faauluuluga o le vaega o le Prosecution poo le ofisa lea o leoleo e nafa ma le finauina o moliaga solitulafono i luma o le faamasinoga, le susuga Salaa Salale, ua faamalolo lē tumau poo ua suspend. O ia le leoleo sinia o loo umia le tulaga faaleoleo o le Suprintendent ua faamalolo i faaiuga a le Komesina fou.
O le Aso Gafua o le vaiaso lenei e tulai ai lea leoleo sinia i le faamasinoga maualuga e tusa ma moliaga ua molia ai. E faatoa iloa moliaga pe a tulai o ia ona e lē o mafai ona faailoa e le Komesina. Pau lana saunoa i tusitala o se mataupu e fesootai ma se faaseā a se aiga na tuuina atu ua mafua ai le faaiuga e molia le alii leoleo sinia ma ave e suesue e le faamasinoga.
Ua toe faamamafa mai foi e le ssusuga Egon Keil o lana pitolaau o le faia o faaiuga e atagia atu ai le faamaoni o leoleo ma tausisia le tulafono. O leoleo foi e lē faapea ei luga atu o le tulafono auā e tutusa tagata uma i le tulafono.
Ua manatu nisi o leoleo sinia sa fesootai i ai mo ni o latou finagalo ae mumusu e faailoa o latou suafa, o ni faaiuga e tutasi lava i le Komesina.
O le masina na tea nei e toalua ni alii leoleo e galulue i le vaega o le vaaleoleo o le Nafanua na faamalolo ma ua o la tuua le matagaluega.
O ni mataupu e faasino i le faatinoga o o latou tiute ua lē lelei, le mafuaaga o le faamuta o le la tautua.
O le tasi mataupu o loo silasila nei i ai le Komesina o se faaseā faasaga i ni alii leoleo na latou tali atu i se valaau e faafilemu se vevesi i Toamua a ni alii o le auvaa o le fautasi o le Littlerina, ae na faaoolima ai ia alii leoleo i se tasi o taulealea.
E lei aumai se finagalo o le Komesina i lea mataupu, ae ua faaalia e le sooupu o le matagaluega le susuga Su‘a Muliaga Tiumalu, o loo faia i ai suesuega, ma a maua ni molimau e faamaonia ai tuua‘iga i leoleo, o le a faatino foi ala o le tulafono.
