Faamalolo e le Komiti Faatonu le tofi FS o Kerita Reupena

O sui ole Komiti Faatonu ole Ekalesia ile aso ole faamasinoga
O sui ole Komiti Faatonu ole Ekalesia ile aso ole faamasinoga

Ua faataunuu lava le finagalo ole Komiti Faatonu ole EFKS faasaga ile Susuga ile Faafeagaiga ia Kerita Reupena o lē sa avea ma Komiti Faatonu a Kuiniselani, o ia foi sa avea ma Faifeau Toeina ole pulega. Ole faaiuga ale Komiti Faatonu na faia lea ile latou fonotaga na usuia ile aso 24 o Aukuso 2016 i Samoa.

Na momoli mai lenei faaiuga e ala ise tusi na tuuina atu ile Susuga ia Rev Elder Lauie Lupematasila ole Komiti Faatonu fou ole Pulega a Kuiniselani.

Na faamaonia ele Susuga Kerita Reupena ile Samoa Times ua mae‘a ona faailoa atu lona faasalaga, na ia ta‘ua e lua vaega o lona faasalaga. (1) Ole a aveesea lona tofi FS (Faifeau Samoa). (2) Ia tulai ese mai le aulotu oloo galulue ai nei i Brisbane.

  Na faailoa foi e Kerita, e tasi le mafuaaga ole faasalaga na tuuina atu ma oloo faaupuina e faapea, “O lona faamaualuga male faaauau pea ole faamasinoga ile tulaga apili.”

Ina ua fesiligia Kerita i sona finagalo e tusa ai ole faasalaga ua tuuina mai na ia saunoa ai i itu matuia ma le lē talafeagai ole faaiuga.

Ole tusi oloo faatuatusi mai ia te au male aulotu, ae ua tatala lava ele autoeaina ole Matagaluega Kuiniselani, ma muamua lau i le latou fono faamatagaluega ile Aso Toonai 3 o Setema. Sa solitū le matou aulotu e lē auai i lea fono, faatoa susū mai lea ole Toeaina Faatonu e lau mai ia te au male matou aulotu le tusi ile aso na sosoo ai, Aso Sa 4 o Setema. O lea foi tusi, ua na ona lau mai, ae lei mafai ona tuuina mai se kopi mo a‘u male aulotu, ole mafuaaga ua lē tuuina mai ai se kopi ole tusi, ona ole faatonuga mai Samoa.

O mafuaaga ole faasalaga e matuai lē tusa ma aiaiga masani ale EFKS “Iloiloga o Iugafono Tumau”. Ile numera 19:2 “Ole faasalaina i soo se amio matagā, ae lē ole mulilua, ia lē toe vave aumaia ia igoa ile Komiti Au Toeaina, seia mavae tausaga e lima”.

E lē ose amio matagā le ave ose mataupu ile Faamasinoga, ole aiātatau faaletagata, pe afai ua leai lava se isi auala e faaleo ai ma soalaupule ai se mafatiaga. E leai foi se tusi mai poo se fesootaiga aloaia mai le Komiti mamalu ina ia faapafala le faamasinoga.

(iii) E lē talafeagai lenei faaiuga poo le faasalaga e faamutaina ai se galuega oloo ola ai a‘u ma lo‘u aiga e tusa ole Tulafono ole Malo Kuiniselani, Ausetalia oloo aumau ai, ma oloo resitalaina ai lenei aulotu. Ole tulafono oloo vaoia ona faamuta soo se tasi, pe afai o iai ni faamasinoga o faaauau pea e lei mae‘a ona oni tiute tau galuega. Ole tulafono foi oloo vaoia ona faamuta ai se tasi ua afaina (victimized) ona o le galuega.

Na faaalia e Kerita lona fiafia ile faaiuga ua aumai nei, ua faamaonia ai le faasalaga ua leva ona fai ele Komiti Faatonu ile masina o Me 2015, e faamuta ai lona tofi FS mole 10 tausaga. Na ta‘ua e Kerita, ua avea le faailoa mai ole faasalaga ua silafia ai ele lalolagi le agatele mai ole Komiti Faatonu.

Aulotu

Ole aso 24 o Setema 1988 na osifeagaiga ai le ekalesia EFKS Ipswich Goodna male susuga ia Kerita male faletua. Ole taimi foi lea na galulue ai male punouai e atinae le galuega ale Atua. Ole masina lenei o Setema e atoa iai le 28 tausaga ole feagaiga osi a Kerita male ekalesia.

Ile taimi nei ose ekalesia ua mautu ana aseta ma meatotino. Ole pine faamau ole galuega atinae ale susuga ia Kerita male faletua i tausaga e tele, ua iai le Falesa, ole Hall, ole fale ole Faifeau i totonu ole fanua e 2 eka, ae ese ai le isi fanua e 43 eka oloo i Tarra.

Ise vaaiga ile lotoifale ole ekalesia, sa maua lava le maopoopoga e ui i feeseeseaiga masani ae sa tasi pea le nuu, tasi le loto. Ose ekalesia ua mautu i faamanuiaga mai le Atua, peitai, o lea ua lepetia lea nofo lelei o fanau ale Atua, ona ole faaiuga ua tuuina mai ele Komiti Faatonu.

Na faaalia ele susuga ia Kerita, ole taimi nei ua vaeluaina le ekalesia, ua lamatia foi le filemu male galulue faatasi sa iai le ekalesia talu mai le 1988. E iai se vaega itiiti ole ekalesia e lē o mananao e faamuta o latou sootaga male Ekalesia i Samoa, ona o tofi oloo latou tauaveina. Na ta‘ua e Kerita, e ui ina faigata, peitai, e lagona lava le mafanafana ole loto ina ua mae‘a ona faia se maliega i itu e lua, ole a tumuli ese i latou oloo iai pea le faanaunauga e faamautu pea sootaga male EFKS, peitai, ole toatele lava o matafale oloo tutumau pea ile matou mafutaga.

Ile taimi nei ua motusia sootaga male Ekalesia i Samoa, ua leai ni faiga taulaga, leai ni faamati poo ni monotaga faapulega ma monotaga faamatagaluega. Peitai oloo tumau pea ona tapuai faatasi le ekalesia ma galulue faatasi e pei ona sa iai a‘o lei aumaia le faasalaga o Kerita ele Komiti Faatonu.

Susuga ia Kerita ma lona faletua ma sui o lana ekalesia
Susuga ia Kerita ma lona faletua ma sui o lana ekalesia

Ole Faamoemoe mo le Lumanai

Ole a faaauau pea le tuuina atu ole mataupu ile faamasinoga apili, ole ā se tali ole a aumai ole a fua foi iai le agai i luma, peitai, oloo manino lava le vaai mamao ale Susuga ia Kerita male ekalesia. “Ua uma ona ta‘utino a ma upu i luma ole ekalesia, afai e manuia le faamasinoga matou te toe foi faatasi uma lava i totonu o le EFKS e faaauau le tautua mole ekalesia e pele i o matou loto.” Na ia ta‘ua foi oloo iai tofi e pei o A‘oa‘o Fesoasoani, o Tiakono ma Ekalesia e fia faaaogā pea mole ekalesia i Samoa.

Ile aotelega o lenei mataupu, ua aveesea le tofi FS (Faifeau Samoa) mai le Susuga Kerita, peitai, oloo faaauau pea le feagaiga na osia male aulotu a Ipswich Goodna ile 1988.

E iai nisi o matafale ole ekalesia ua faamaamulu, ona oloo iai pea lo latou agaga e fia faaauau ona tautua ile ekalesia i Samoa. O i latou nei ua o ese, ae oloo tumau pea le ekalesia mase vaega tele ole aulotu faatasi male faifeau ile ekalesia Ipswich Goodna.

Oloo faaauau pea le talosaga apili a Rev Kerita ile iuga ole faamasinoga male Komiti Faatonu, male faamoemoe a manuia le faamasinoga, ole a toe foi faatasi uma lava laua faapea le ekalesia e faaauau le tautua ile EFKS, ole ekalesia e pele io latou loto.