Ole tele o ata tifaga ma dvds, o taumafaiga a alo ma tamafanau a si o tatou atunuu, ose tasi lea vaega e tele ina koma ma mapu iai soo se augatupulaga e oo lava i tagata matutua auā e momoli maia le fiafia i loto o tagata ma aumai ai ni vaega tāua e maua ai ni aoaoga lelei. E le gata i lea, e fiafia ai ma faapasi ai taimi pe a malolo mai i galuega.
E momoli ai la le agaga faafetai ia i latou oloo tapenaina ia vaega mananaia auā le silamaimoa ale atunuu lautele. Ole lava saunia ma le tapenaina lelei, ole faatupulaia foi lea ole pulunaunau e tuli tatao isi vaega poo le toe sosooina, faapea le toe eva ai ma tausami popcorn i faletifaga, auā ole tala moni e seasea oo nisi tagata i faletifaga ona ole pisi, sei vagana nisi o ata nei.
Ole Aso Toonai 24 o Fepuari na feiloai atu ai ile vaega e autu ai le ata ole Hibiscus & Ruthless e pei ona aave mai ona tala, ua mae’a ona maimoa iai Sini ma Melepone ae o lea ua faasolo mai i Brisbane. O lenei ata, sa tusia lava, pueina, ma faatonutonuina e le susuga ia Stallone Vaiaoga Ioasa (Toamua & Puipaa) lea sa tusia ma pueina le ata lauiloa ole Three Wise Cousins e pei ona maimoa foi iai le toatele o tagata i faletifaga, ma matuai fiafia ma talanoa iai ile manaia.
Ole saunoa mai ole susuga ia Stallone e pei ona faasoa mai, e maoae foi le talenia ma le tomai ua tuuina iai e le Atua ia te ia, o lona lava ia lea naunautaiga, ia tusia ma pueina ni ata mo i tatou lava ae tuuina i faletifaga e gasolo atu tagata e evaeva ma tafafao ai, ma maimoaina e ese mai lou lava maota, ose suiga foi lea.
Sa tele foi tusitusiga a nusipepa i Niu Sila e faatatau ile ata lenei e pei molimau se isi o tusitala papalagi mai se tasi o nusipepa ale Fairfax, ole ata pito sili lenei ona mālie ile tala faasolopito, ole tele foi o vaega ole ata e faaaogā le gagana Samoa ina ia malamalama ai o tatou lava tagata. Ose ata e maua ai le ata, tagi, faanoanoa, alofa, nutimomoia, ae ole tele foi o a tatou tu ma aga ua amata ona galo aemaise o nisi o a tatou gagana ma aga masani o aso uma oloo faatinoina ma maimoaina. Ae ole sini lava ma le autu ole ata tifaga lenei, ia maua le fesootaiga lelei ile va o mātua ma fanau.
Ole tele o taimi e leai se avanoa e fetufaai ai mātua ma fanau, ona e iai nisi aiga ua tele le pisi i mea fai ma nisi vaega e auai atu iai, ua tau lē maua ai ni taimi e faia ai ni faasoa faaleaiga e faamalamalama ai ni mataupu e malamalama ai le tasi ile isi, ona e feeseeai lagona ma manatu ma oo ai lava ina fetaua’i ma tauupu. E iai foi nisi mātua ua oo ai ile tulafono ona ole soona faaoolima i alo ma fanau.
Ae ole autū, ina ia silafia ai e mātua faapea fanau le taūa ole fefaasoaai. Ole tele o nai o tatou mātua sa asaina mai fitā o aso ua mavae, e naunau lava ia manuia fanau. O fanau o loo ola ae i atunuu i fafo e faigata tele ona talitonuina ma silafiaina. E iai nisi mātua, e le o malamalama ile mau faafitauli oloo feagai ma i latou, e le gata i aoga, ae o faigauo, lea ua maimau ai le tele o soifua, ma nisi lava o faafitauli e pei o sauaga i luga o upega tafailagi lea ua tele ina maliliu ai le toatele o talavou ua lē mafai ona iai se tasi e talitonuina ma faasoa atu iai.
O lenei ata, Hibiscus & Ruthless, e autu ise faigauo ani tamaitai se toalua. Ole tamaitai Samoa o Hibiscus ma lana uo palagi o Ruth. O nei tamaitai sa ola faatasi ane lava mai lo la laiti. O Hibiscus mai lona laititi, e mātua faasā e lona tina ona alu ise mea. O faatonuga uma a lona tina, nate usitaia.
Pau lava le faanaunauga ole tina o Hibiscus, ina ia toaga le teine ile aoga ma le lotu, aoga, fale, galuega aua lava nei faia se uotama. E iai eseesega ole olaga o Ruth ia Hibisucs, e matuā faigata tele, e fasi tamaititi, e tele ina faasala ile aoga ona ole ulavale, e lē avea sana lunch ae maona i lunch a Hibiscus e pei lava o ia e ona. O iina na amata mai ai le faigauo a tamaitai nei. Ole faasalaga o Ruth ona o ana amio paaa ua pei lava ole mea fua auā e faasoa iai e Hibiscus ana meaai.
Ole ata lenei na amata ona tusia ile faaiuga ole 2016, e ono masina o tau tusia le tala. Ole amataga o Iulai 2017 na pueina ai le ata, ma e 14 lava aso na pueina ai le ata atoa. Ina ua mae’a ona pue, sa tele se taimi na alu ile toe faaleleia ma fetuunai (editing). Ole World Premiere sa faia ile Civic ile aai o Aukilani tutotonu ile aso 16 Ianuari 2018. Sa matuā faatumulia lea po ma e maua le 1600 o tagata sa mafai ona auai.
Ua fuafua a mae’a loa ona faaali le ata i fale tifaga i Amerika ia Iuni 2018, ona sauni loa lea e tapena DVDs auā le silamaimoa a nai tuaa matutua e lē mafai ona maua i upega tafailagi.
Ona ole tele ole sao o nai o tatou tagata i Ausetalia ile Three Wise Cousins ma le seleni na maua ai, lea ua mafai ona faatupe ai le Hibiscus & Ruthless, ole ala lea ua ae ai se tofā ile susuga ia Stallone ma le pulega ale M2S1 ina ia malaga atu nisi ole vaega ale Hibiscus & Ruthless i Ausetalia e feiloai ma le mamalu o si o tatou atunuu ia avea lea ma faafetai ile lagolagoina o nai taumafaiga a nai a tatou tamafanau. O lea la ua mae’a feiloaiga ale vaega lea e autu iai le ata ma le toatele ole mamalu o lo tatou atunuu i Ausetalia. O nei feiloaiga sa faia i Sydney, Melepone ma Brisbane lea na faaiu ile po ole Aso Toonai 24 o Fepuari 2018.
O Hibiscus, oloo faatinoina ele tamaitai o Suivai Pilisipi Autagavaia mai Vailoa Palauli ma Fogatuli. O Ruth oloo faatinoina ele tamaitai o Anna Maree Thomas mai Christchurch. Ole tamaitai lenei, e lei soifua ane ma ni tagata Samoa, ae o lona faatinoina ole galuega a Ruth, e pei ai lava sa mafuta ma ola ane ma nai o tatou tagata.
Nafanuatele Lafitaga Mafaufau (Vailima ma Faleatiu). O ia oloo fai ma tina o Hibiscus. Yvonne Maea-Brown: Oloo fai ma tina o Nafanuatele Lafitaga (Hibiscus grandmother)
O nai alii ia e faatinoina le matafaioi lea ole taumafai e faasesē le mafaufau o Hibiscus ina ia aua le alu ile aoga: Thierry Martel (Amaile, Samusu, Lalomanu); Daya Sao-Mafiti (Gautavai); Haanz Faavae Jackson (Tonga ma Niue).
Ole ata lenei ua galulue faatasi ai foi le susuga ia Stallone ma lona tuafafine ia Abba Rose Dinah Vaiaoga-Ioasa. O Abba Rose o ia ole Producer ole ata tifaga lenei ole Hibiscus & Ruthless.
