Faamagalo Lomeo i lona tina

ame-3-romeo

Na ou faalogo loa ile mea o iai lo‘u tina o‘u alu loa iai e sue i Mapuifagalele. E faamatala le alii o Lomeo ma ona foliga faanoanoa, a‘o gasolosolo mai lava tagata savavali ole auala ma lafo siliva i lana ipu pepa oi ona luma.

E oo mai nei e lē o iloa tonu e Lomeo poo le ā le matua o lona soifua, talu ai, ua tele aso ma tausaga o nofo toatasi e leai ni ona mātua, ae sa faamatua lava i tagata ole atunuu e alolofa iai ma maitauina le olaga tuputupu a‘e o Lomeo ile taulaga.

“Oute manatua lava le tala a lo‘u tina na fai mai ia te au ile maketi i Savalalo i aso la, fai mai oute faatali atu se‘i alu e ave le tusi sau ai. Ole alu atuga lava lena o lo‘u tina e po ifo lava le aso o o‘u faatali, toe alu male isi aso male isi aso. Ole faamatalaga foi lea a Lomeo na fai ile pulega ole Survival Foundation i Malifa ile tusa ole 20 tausaga talu ai. A‘o laititi le alii sa vaaia lava ile maketi o i‘a i Savalalo o nofonofo ai ma fai feau a tagata e maua ane ai ona fesoasoani, ma ave ai ele Susuga a Tuilaepa Mary Grey, ina ia vaaia e lana polokalame i lena vaitaimi.

Peitai ole maua o lona tamā ma lona tina ose tala faaopoopo lea ile soifua o lenei alii. “Na ta‘u mai ele tagata ia te au, fai mai o lo‘u tina (taofia le suafa ole tina) la ua ile Mapuifagalele. Sa ou alu loa iai, oute fia vaai iai, ae ou alu atu, o lea lava oute maitauina ona foliga ma oloo ia iloaina foi a‘u. Ae ua ia lē manatua lana mea leaga na faia ia te au.”

Ole talanoa a Lomeo sa foliga mai, e lē ose faafitauli tele lea itu i lona olaga ile taimi nei, auā ua tama matua, ua maua foi lona aiga oloo nofo ai ile taimi nei ma agalelei ia te ia.

“Oute fai atu i lo‘u tina, pe o ona manatua lana tala e alu e ave le tusi toe sau ai, ae fai mai na te lē o manatuaina.”

Peitai o na mea uma, ua faamagalo e Lomeo lona tina, ae ua ia tausia nei i Mapuifagalele. “Oute alu lava e asi pe a maua sa‘u tupe. Ua ou faamagalo i lona agaleaga ia te au. O lo‘u tamā foi oloo nofo i Lepa sa ou alu foi iai e vaai ile isi aso.”

Na faamatala foi e Lomeo lona olaga ole taimi nei, ua matua ma ua iai le aiga ua fai nei ma ona aiga, ua moe lelei ai ma ‘ai. Ae ua lē toe alu ile falei‘a. Ua lavalava lelei foi.

Peitai ua sologa lelei lava le ola ile taulaga, ma ua faigofie foi ona ia maua le tupe maua gofie, e ala ile lima foai o tagata.

Ua saofai ai nei i tua ane ole polotito ole fale mo faalavelave tutupu faafuasei. O iina e uia tele ele toatele o tagata e o ile taulaga, “e maua lava le selau tala la‘u tupe ile aso.”

O na tupe e fai ai faatau o mea e manao ai. Ole ituaiga olaga tonu lava lea e oo mai ile taimi nei oloo tetee tele iai le tamaitai pule ole faalapotoptoga ole Survival Foundation, Tuilaepa Mary Grey.

Ona fai mai a ia, “a tatou toaaga e ave tupe i tagata oloo aisi ile taulaga ma soo se magaala, ua tatou faamalosia ai na tagata e faaauau ai pea ona o latou faia le ‘aisi, ae lē o i aiga e atinae ma sue ni galuega.”

Ae ole mau a Lomeo, ole alofa o tagata ua tali mai i lona manao, e nate taliaina male faafetai.