‘Ou te faamagalo i le alii na mafua ai le maliu o si o matou tamā auā e mautinoa o le agaga foi lea o si o matou tamā e manao i ai pe ana o soifua mai, ia faamagalo auā e pei lava o le vaai i o matou mata ma o se fanau foi ia te ia’, Jennifer Posiano
O le tala ua logo ai le lalolagi atoa i le maliu faafuasei ai o se tasi o tamā e molimauina e le toatele ona uiga tausaafia i taimi uma, le tofa ia Leifi Ateliano Posiano o lona suafa lea ua lauiloa ai i Brisbane (63 ona tausaga mai Safotu i Savaii & Fasitoo).
O le mafuaaga ona o se feseeseaiga na tupu i le kapaka e pei ona salalau ai le tala. O le taeao lava lea i le latou Misasa masani i le 9 i le taeao, na ta‘ua ai e se sui o le Divine Mercy sa saunoa ai le afioga ia Patele, Father David Batey na molimanao ai lava Leifi e fia fai sana Kofesio ae lē o se tulaga e masani ai.
Na talia e Father le manaoga o le Tamā, na mae‘a, amata ai ma le Misasa, ma agai atu loa i le taulaga faatau i Logan, lea na tupu ai le faalavelave ma maliu ai. E tele naua le mau faamatalaga o le faalavelave na tulai mai peitai i se molimau maumaututu lava a se tasi o tina Samoa (lē fia ta‘ua lona suafa) sa faatalanoa o ia e leoleo i le amataga ma le faaiuga o le faalavelave na ia molimauina.
O le tina lenei sa kolosi i luma o le taulaga faatau i Logan ae o loo give way Leifi i tagata o le kolosi a o agai atu e saili sana ka paka, peitai na oso faafuasei mai le taavale a le alii palagi lea ma faii ana pa‘u masalo e fia natinati i luma ae e tatau na give way i tagata i le kolosi.
Na oso faafuasei ane le alii lea ma muamua i luma o Ateliano ma agai loa o ia e paka. Na gata ai iina le silafia o si faletua lea seia oo ina toe foi mai le Bank mo nai minute ma ia vaaia ai Leifi o taatia atu.
Na te lē iloa le taimi na fusu ai Leifi ma le alii palagi lea e 24 tausaga e pei ona ta‘ua i le tele o lipoti, peitai na ia ta‘ua ana ia iloa e iai se mea e tupu semanu e lē alu i totonu ae se‘i ona molimauina peitai auā o laua e iai i le Divine faatasi ma Leifi Ateliano.
O lona ia masalosaloga, ai na mae‘a se taugaupu ma se pa‘igalima e lei maliu ai iina Leifi ae masalo o lona te‘i i le mea na tupu na savali ese ai ma ua mamafatu i lona mafaufau ma aafia ai i le heart attack e pei ona ta‘ua e ripoti a fomai.
E lei umi se taimi na agai ai le tina lea i totonu ma toe taliu mai i fafo ma ia iloa mai le tagata o taatia atu auā e lē mamao ma le Bank. O le tagata muamua na taunuu i ai o le Security palagi o ia lea na ia faia le CPR mo Leifi, na natinati atu ma ia mautinoa o Leifi lea, na tuu ane e le security ia te ia le matatioata a Leifi Ateliano a o taumafai pea le CPR ae o le taimi lea e lei taunuu ane le taavale a le falemai.
E logomālie ma manino le molimau a le tina ma na mulimuli ane tumu atu loa tagata ma le taavale a le falemai. Sa taumafai togafitiga ma ia vaaia le ie paepae ua fofola i luga o Leifi na ia iite lava ile taimi lea ua siliga se togafiti.
Na maua se avanoa e talanoa atu ai i le alo tamaitai o Leifi Ateliano i le taeao o le Aso Gafua na tea nei. Na uigaese foi le matagofie o le saunoaga a Jennifer Posiano ma ia ta‘ua ai e ui ina faigata le motusia faafuasei o le latou mafutaga, peitai ua faamagalo i le alii na mafua ai le maliu o si o latou tamā auā e mautinoa o le agaga foi lea o si o latou tamā e manao i ai, ia faamagalo auā e pei lava o le vaai i o latou mata o se fanau foi ia te ia.
E moni auā e molimauina lava i le taimi e pueina ai ata o nisi o latou faamoemoe i le tele o taimi, na o si ana ataata lava e lē o se tagata e tautala soo se‘i vaganā o se tala mālie poo se manatu e faaali mai.
Na tele ni itu lelei na faasoa ai Leifi i lana Divine Mercy i le vaiaso ua tea ae lilo i manatu o lona toe taimi lea i luga o lenei fogaeleele.
Ua misia le mafutaga ma si ona faletua ia Hellen Posiano ma le nofoaalo e to‘a 10 aemaise aiga pele, uo ma paaga ma le Divine Mercy a Woodridge, ae lē gata i lea o ia o le tenor faamoemoeina a le Divine Mercy ua matuai misia lona siufofoga malu i le aufaipese.
E lē misi Leifi i Misasa i le 7 i taeao uma i aso o le vaiaso amata i le 9 i le taeao e pei ona faatalanoa ai nisi i totonu o lana Divine Mercy aemaise le aiga.
O se saunoaga a si ona alo tamaitai ia Jennifer, o loo tālia le toatele o ona aiga malaga mai, ma ua faamoemoe o le aso 31 o Mati e faia ai ona sauniga faaleaiga, ae o le aso 1 o Aperila ona sauniga faaiu e faia lava i le Palisi a St Paul i Woodridge, e saunia e le susuga ia Father David Batey faatasi ma lana Divine Mercy i Woodridge.
Ia faamaise le agaga o le Atua i le tina ia Hellen Posiano ma le nofoaalo faapea aiga o loo tagi mai ala, uo ma paaga masani.
