Ua lē faamalieina faipule o loo agaia le faigamalo i tali ma faamalamalamaga ua tuuina atu e faatatau i se faaiuga a le Malo e ala mai i le Kapeneta ua faapea ona faamagalo ma soloia ai aitalafu o pili telefoni a nisi o Matagaluega ma Faalapotopotoga a le Malo e tusa lo latou aofai ma le $34 miliona tala.
“O se faiga lē talafeagai tele auā o le Malo e tatau ona taulamua i le faia o le mea tonu e ala i le faamalosia o le totogiina o ia pili telefoni”.
O le finagalo lea o le faipule o Vaisigano Numera Muamua, Afioga Vaai Papu ina ua faailoa lea faaiuga a le Kapeneta i se lipoti na tuuina atu i le Palemene.
O se tupe tele pe a fua i le 34 miliona e pei ona saunoa le sui faipule.
Faaalia e Vaai Papu o loo filigā ma taumafai pisinisi tumaoti e totogi a latou pili telefoni, ae a vaai atu i le faiga ua faamagalo ai ia aitalafu e lē o se mea amiotonu.
O le mau foi lea a se isi faipule o le Itu Agai, le susuga Levaopolo Talatonu.
Na ia saunoa o se aiga lima vaivai a lē totogia le pili $50 tala e vave tele ona motusia atu le fesootaiga tau telefoni laina a le Samoa Tel, ae o lea ua faamagalo le fia miliona sa tatau ona aoina mai mo galuega a le Malo mo le lelei lautele o le atunuu.
Sa fesiligia le Palemia, Susuga Tuilaepa L Sailele Malielegaoi, i sona finagalo e tusa ma lea mataupu, ae sa ia ta‘ua, “O pili nei ua tele tausaga o taatitia, a sue atu i tagata ae fai mai latou te lē iloa ia pili.
O nisi tagata sa galulue i matagaluega i taimi na faia ai ia pili ua maliliu. O le mea sili la ona faigofie i tagata e sueina tusi o le soloia loa”. O le tali lea a le Palemia ina ua fesiligia i se talanoaga i le Aso Gafua ua mavae.
E lē o se taimi muamua lea ua soloia ai ni aitalafu i totonu o le Malo.
O nisi o paeaiga a le Palemene ua mavae na soloia ai nisi o nonogatupe na faia i le Faletupe o Atina‘e poo le Development Bank, na faia a o lei āfatia Samoa i afā fulifao o Ofa ma Valelia. Na mafua ona soloia ona o mafatiaga sa feagai ma le atunuu ona ia afā tetele.
E lē o manino mai i le lipoti faaletausaga na tuuina atu i le Palemene poo ai Matagaluega ma Faalapotopotoga a le Malo e faasino tonu i ai le $34 miliona o aitalafu o pili telefoni ua soloia nei.
