O le su poo le tagi a le afioga Leota Leulua‘ialii Itu‘au Ale e totogi atu e le afioaga o Solosolo (Alii ma Faipule ma i latou na aafia) i le susunuina o lona maota ma satia ai nisi o ana meatotino le tasi le miliona tolu selau afe tala ($1.3miliona), ua tafa le finagalo o le tamalii ma ua ave i tua ma le faamasinoga le mataupu ona o lona loto faamagalo.
O le aso 17 o Fepuari o le tausaga e 2012 na tulai mai ai lea faalavelave e mafua i se mataupu faalotoifale na toai i le foga a le Malo poo le faamasinoga ma manumalo ai Leota, ae taualuga i le aafia o lona maota ma nisi o ana meatotino i le afi.
Na molia ai ni taulelea o le nuu ma ua mae‘a ona faia i ai se faasalaga a le faamasinoga ina ua faamaonia le moliaga o le susunu fale. “Ua ou manatu e faamagalo ua lava foi lea aemaise ua iai lo‘u tofi Aoao Fesoasoani”, o le finagalo lea o Leota ina ua tapa sona finagalo e tusa o lana faaiuga e toe aumai i tua lana tagi.
O le aso 16 o Iuni o le tausaga nei 2014 na tusi atu ai le afioga Leota i le Loia sili a le Malo ma faailoa i ai se faaiuga ua taunuu i ai ma lona faletua faapea ona alo ma lona aiga, ina ia toe faaui mai i tua le tagi e faasino i le totogiina o ana meatotino na aafia i le afi.
O le iva aso talu ona ave lea tusi ae maua le tali tusitusia mai le Loia sili le afioga Aumua Ming Leung Wai i le aso 25 o Iuni, ua faailoa atu ai i le Sui komesina o leoleo susuga Fauono Talalelei Tapu le talosaga a Leota e toe aumai i tua le tagi.
“Ua taulimaina e lo‘u ofisa le tusi mai le afioga a Leota Ituau Ale e talosagaina ai le mataupu lenei ina ia toe faaui mai i tua.
O lea foi ua talia e lo‘u ofisa le talosaga a Leota e pei ona folasia i lana tusi ua faapipii atu mo le silafia. Tuuina atu mo le silafia faapea se fesoasoani talafeagai a le matagaluega,” o le tusi lea a le Loia sili i le Sui komesina o leoleo.
Tusi a Leota Leulua‘ialii Itu‘au Ale
Solosolo
16 Iuni 2014
Lau Afioga Tuatagaloa Aumua Leung Wai
Loia Sili o le Malo o Samoa
Maota Tuiatua T.T. Efi
Sogi, APIA.
“Susuga e Tuatagaloa,
E maualuga pea ma tumau le viiga ma le faafetai i le Tapaau Sili i le Lagi auā o loo maualuga pea le aoina o le masina i lau afioga a o feagai ai ma le lasi o ou tiute o loo feagai ai ma lau susuga i le Toosavili.
O la‘u tusi lenei e tusa o le ta feiloa‘iga i lou ofisa i le Aso Lulu 4 o Iuni 2014 e tusa i lo‘u faamagalo atu i lo‘u nuu ma le tatalo ina ia faasolomuli mai i tua le faamasinoga e faasaga i Alii ma Faipule o Solosolo.
O le mea lea, ou te toe faamautuina lo‘u manatu ua maua ma le Tina o le aiga ma le fanau ina ia faamagalo atu i Alii ma Faipule o lo matou nuu o Solosolo e tusa i le mu ma faaumatia ai a matou meatotino i le Aso Faraile 17 o Fepuari 2012, ina ua mae‘a ona lauina le faaiuga lona lua a le faamasinoga o Fanua ma Suafa e faaleaogaina ai le Tootoo o le nuu ona e lē mafai ona faatulaiese a‘u ma lo‘u aiga mai o ma fale ma fanua ona e leai se agasala matuia poo se isi mafuaaga talafeagai.
O le lua ai lea o faaiuga, auā o le isi foi faaiuga o Tesema 2009, lea foi na tu ai le isi tootoo. Na faalelei lo matou nuu ia Oketopa ma Novema 2011, ma sa matou faaalu ai le silia i le $24,000 tala i le faataumamafaina ma tali toga ma ta‘i sua, o faaaloaloga masani i Faifeau ma le Taofia ma le Aloalii.
Na‘o le 4 vaiaso ae toe tu le isi tootoo lea la na lau mai ai lona lua faaiuga i le aso 17 Fepuari 2012. O lenei lua tausaga ua matou manatu, ua lava ai foi faapea. Ou te faamagalo atu, ae agai pea i luma, ua lava faapea.
O le a ou fautuaina foi Loia e taofi le su ua fuafuaina e $1.3 miliona tala mo meatotino na faaumatia e le afi ma isi tulaga e aafia ai. O le tusi atu lea ma le agaga faamaulalo ma le faaaloalo tele.
Ia manuia tiute o lau Afioga,
Ia soifua
Leota Leulua‘ialii Itu‘au Ale.
