Faamae‘a tauvaga pese a le Mapu Maia Services

“Ioe i le aiga, Leai i taaloga faitupe”

O le tolu ai nei o tausaga o faia pea lea polokalame, o tauvaga tusiga solo ma pese, e tuufaatasia lea e le auaunaga a le Mapu Maia Services ma le Tupu Services o le Problem Gambling Foundation of New Zealand, i le faalauiloaina lava o aafiaga o taaloga faitupe i totonu o aiga, aemaise o le aafia ai o le fanau laiti i nei faafitauli.
O le Mapu Maia o loo faauluulu i tina Samoa, le faletua ia Pesio Ah-Honi Siitia, (Pacific Manager) lea e fitoitonu le auaunaga mo tagata Pasifika talu ona tatala i le 2009.
Ma o se tasi nei o a latou polokalame faalauiloa e pei ona iai se tauvaga pese mo aiga, faatoa faamae‘a i le faaiuga o le vaiaso talu ai, i le po o le Aso Faraile, aso 13 Setema.
O se polokalame ua aogā tele, auā e lē gata ua tatala ai le malamalama ma le iloa mo tagata lautele ua lapataia ai i le matautia o le ogaoga o le taalo masini poka ma le Casino, ae peitai ua fesoasoani tele mo le nofo silafia o tagata uma, o ni faamatalaga aogā, e tusa lava pe taalo i taaloga faitupe pe leai, o se polokalame e aogā tele mo aiga uma o le Pasifika.
O le faaiuga o le vaiaso, lea na faamae‘a ai le tauvaga pese mo aiga pei ona sa faalauiloa i luga o le niusipepa faatasi ai ma le auaunaga a le Radio Samoa. E tolu vaiaso sa faagasolo ai i aso taitasi, ae tasi le autū na tauva i ai, ‘Ioe i le aiga, Leai i taaloga faitupe’.
E lua vaega na vaevaeina i ai le tauvaga; o le pese faasamoa ma le pese faaperetania, o le avanoa mo aiga e faaulu ai a latou pese tauva ma na faia lea i le Otahuhu Town Hall i le po o lea Aso Faraile.
E toatele nai aiga na auai i lenei tausaga, peitai e tasi lava le manumalo o le pese faasamoa, tasi le faailoga mo le pese faaperetania, faatasi ai ma nisi faailoga e oo atu i le tulaga fā ma le tele o nisi o meaalofa na lautogia uma lava le toatele ma tofusia uma sui tauva o le tauvaga.
Sa matagofie le polokalame i lea afiafi, ua o se aiga e tasi, tutu faatasi e tetee i aafiaga o taaloga faitupe i totonu o aiga.
O le toatele o aiga, e ui e lē o ni aiga taaalo i masini poka, peitai ua sii lima lava e ofoina le taleni e faasoa e ala i pesepesega, e fesoasoani ai i le galuega fai a le Mapu Maia ma le Problem Gambling, e momoli le feau i le leaga o aafiaga o taaloga faitupe, aemaise o le fanau iti o loo aafia i totonu o aiga.
O le pese faasamoa na manumalo ai le aufaipese ua faaigoaina o le ‘Brother and Sister’, o le tama ma lona tuafafine. Matagofie le la pese, manaia o la siufofoga ma manino upu ma le feau na faaautu i ai le pese, aemaise o le fati ma le taina o le kitara, ua aufaatasi ai alii faamasino tuuina le manumalo i le Brother and Sister mo le pese Samoa.
O le pese faaperetania na tulaga muamua ai Jireh ma Jiroh Mamea, na o le toalua foi i laua.
O le taina o le kitara, o upu ma le fati o le pese, aemaise o le vaega o le pese na Rap poo upu faamatala, na ese mai ai le la pese mai le tele o fatuga i lea po.
E toaono alii faamasino na nafa ma le galuega fita, e aofia ai i lea toaono le Afioga Toaletai David Tua, Joe Failua, Seumanu Francis, ma isi faamasino, ma le faamoemoe o le a toe maua foi nisi avanoa faapenei e galul ue faatasi ai le community ma le Mapu Maia Services, soosootau‘au faatasi ma le auaunaga a le Radio Samoa mo nisi polokalame i le tausaga fou. Ma o le iuga la lenei o le tauvaga pese:
Pese Faa-Samoa
1st Brother and Sister
2nd Le Va’a Family
3rd Kanana Fou Family
4th Maugakiekie

Pese Faa-Peretania
1st Jireh ma Jiroh Mamea
2nd Kanana Fou Family
3rd Vaafa‘i Aiaoge Family
4th Happy Family