Faamae‘a polokalame mo tuuaga o aoga (Break-Away Programme)

O le polokalame ua faaigoaina o le Break-Away Youth Holiday Programme, o se fuafuaga faataatia a le Matagaluega o Atina‘e (Ministry of Social Development) na faaagaga mo fanau aoga mai le 11 seia oo atu i le 17 tausaga le matutua.
O se vaega o le $3.0 miliona tala o le paketi e faasafua mo Niu Sila atoa, e ala lea i le faatinoina o nei polokalame mo fanau aoga. E tele pitonuu o Niu Sila na faagasolo ai nei polokalame e aofia ai ma le Break-Away programme sa faia i le pitonuu o Otahuhu i le Recreation Centre mo vaiaso e lua o le tuuaga a le fanau aoga.
O le auga lava lea o le faatupeina e le Malo o nei polokalame, ina ia unaia ai le fanau, e faamalositino ma taaalo i taaloga eseese i le taimi o tuuaga o a latou aoga, auā e pei ona maitauina i taimi faapenei, o le taimi lelei lea o le matamata TV ma le taaalo i taaloga i luga o computer ma nonofo ai lava i totonu o le fale i le aso atoa ma lē gaioi ai lava le tino.
I nisi o suesuega, ua maitauina ai o se tasi nei o faafitauli tele ua feagai nei ma le fanau, ona o le malosi mai o le poto faatekonolosi, ua o se mea suamalie ai i le fanau laiti le omiomi lava o le taaloga ma le taumafa i meaai lē paleni, atoa ai ma le leai o se faamalositino, ua tele ai le tino puta ma mama‘i ai tamaiti.
O le Aso Faraile na tea nei na faamae‘a ai le polokalame Break-Away a le pitonuu o Otahuhu, silia ma le 40 o tamaiti na auai, mai aoga eseese ma soo se tagatānuu lava.
O taaloga e iai basketball, volley ball, netball, touch rugby, hockey, badminton, soccer sa faia i nei vaiaso e lua, faapea ma siva faaonapo nei sa faatinoina i le Aso Lulu o le vaiaso mulimuli.
O se fuafuaga lelei ma le tāua le tuufaatasia o lenei polokalame faamalositino mo le fanau aoga, auā ua tata‘i ese ai manatu ma lagona o le fanau mai le fia nofonofo i le fale e  matamata le TV ma taaalo i le X-box, ae ua sui se isi laasaga ma atinae le itu tau taaloga ma le taleni siva o loo faamanuia ai tamaiti aoga i lenei vaitaimi.
O se avanoa lelei foi na faamasani ai tamaiti aoga mai le isi aoga i le isi aoga, faaitiitia le femisaai, ae taulai i le atina‘eina o le olaga i ona vaega eseese, e iai le iloa ona pulea o amio i le va ma soo se tagata, i le taimi e taaalo faatasi ai, pe sisiva pe aai, e amata atu i totonu o le polokalame, ma faasoa atu i totonu o aiga, aemaise o le toe foi i aoga i le vaiaso fou.
Na faaiu i se laugatogi, i le sailia o tamaiti e lelei ma pulea amio i totonu o le polokalame, faapea le taumafataga na saunia e faamavae ma faamae‘a ai le Break-Away o lenei kuata. O loo iai le faamoemoe, o le a toe faia foi le isi polokalame faapenei, i le tuuaga o aoga o lumanai nei.