O siufofoga mālū o tamā ma tina matutua o le mafutaga tatalo a Magele na latou siitia ai le taulaga fiafia ma le faafetai i le Atua ona ua faaiuina ma le manuia galuega sa latou tauasa mai ai i lenei tausaga.
O le aso nai Moamoa ua pepese fiafia ai ma Haleluia auā ua mafai ona toe faafoisia le malosi i nisi o tamā ma tina sa faataotolia i gasegase o le tino ae faapea foi ia i latou sa toesea i fuafuaga faaleaiga i nisi o atunuu.
O le hall a le Ekalesia o le Au Uso Kerisiano i Magele sa alaga ai ia pesega o le manumalo, faatasi ai ma le upu faauuina a le Atua na saunoa i ai le taitai o le mafutaga ia Rev Afa Pulotu. Na saunoa le faafeagaiga, “ua iai i le vaitau o le Kirisimasi ae o loo iai pea i le alofa o le Atua.”
Na faatumulia le hall i tina ma tamā matutua aemaise ai o nisi o malo asiasi sa latou militino faatasi e molimau le toe aso. Na vaaia loimata o le fiafia e puna a‘e ai le olioli i totonu o le loto i nisi o molimau a tina sa faataotolia i ma‘i o le tino, ae peitai o le Atua Soifua ua ia faia vavega mo i latou, e pei ona molimau ai le tina ia Eseta, ma Maua.
O aitema a ulugalii matutua e ala i pese faaleagaga o se tasi lea luitau sa faamalosia ai loto o tagata uma ina ia toe maua se isi mafutaga ma se feiloaiga i le tausaga fou pe a tusa ai ma le finagalo o le Atua, ae lē gata i lea ua toe tatagi lelei ai siufofoga o teneiti ma tamaiti a o iai i le fitifiti o le malosi.
E lē ma‘ima‘i le sausau o loomatutua i le pepese i pese palagi, ae o le faamanatu lea e toe fafagu mai ai le saili malo o mātua i aso ua mavae auā se manuia o aiga ma Ekalesia ma nuu.
O se tasi itu tāua o lenei polokalame o le tausi lelei o le soifua maloloina e pei ona iai faamalositino lea sa taitai e le tamā ia Masina.
Ae o le afioga ia Tupai Robertson na molimau i le lelei ma le matagofie o uso ae nonofo faatasi. Faapea foi lana molimau i le pulapula la goto o le soifua ua iai ae o loo vaaia le puna pea o le vai i totonu o le mafutaga. Na faailoa foi a latou meataulima sa faatino a o iai i mafutaga i vaiaso taitasi, e pei o ula, ma taga aluga.
O le susuga i le faafeagaiga ia Fatu Mataia sa fai ma fofoga o le aso, ae o le tofa ia Saulua sa fai ma sui o le Ekalesia e molimoli ni meaalofa i susuga i faafeagaiga e talimasineia ai galuega faigata sa latou feagai ai i le tausaga atoa faatasi ai ma meaalofa mo i latou sa tausia le mafutaga.
Ua su‘ifefiloi le manogi o le lolo i le matagofie ma le faamalosiau o tagata eseese, faapea le faafetai a le susuga i le faafeagaiga ia Rev Pulotu i le mafutaga atoa i le onosai ma le lava papale i polokalame o le tausaga. Na taualuga le faamoemoe i le faleaiga o le Happy Days e faaauau ai le mafutaga ma talatalanoa ma aai faatasi.
O le Mafutaga Tatalo lenei, e soo se tasi lava o tagata matutua o loo auai mai ekalesia eseese, ma o Aso Gafua o vaiaso taitasi o loo faatino ai lenei polokalame. E muamua lava i le mafutaga tatalo ma le upu faauuina a le Atua e saunia lava e susuga i faafeagaiga o loo auai ona sosoo ai lea ma taaloga, pelē ma le komino, ae faaiu ai i le taumafataga.
E silia i le 30 tagata matutua o loo faaaogāina lea avanoa auā e tutusa lelei latou tala ma latou teuga ma toe faamanatu ai aso o le talavou.
O le susuga i le faafeagaiga ia Rev Afa Pulotu, Rev Fatu Mataia ma Rev Pati Faaiuaso o loo taitaiina lenei mafutaga.
