O lea ua toe foi mai i Samoa le faigamalaga a sui o le Malo aemaise le afioga Mamalu i le Ao o le Malo o Samoa ia na valaaulia i le faamanatuina o le 115 o tausaga o le fu‘a o Amerika Samoa, le tausaga na sisi ai le fu‘a o Amerika i lea itu o le atu Samoa ma avea ai ma teritori o lea malo tele.
O le valaaulia la o le tausaga nei mo faafiafiaga faa-Samoa aemaise o tausinioga poo faagatama i le tai, o le aogā lea o matata eseese a le Ekalesia Katoliko i Samoa, le Don Bosco i Alafua.
Na mataina le taualuga o faafiafiaga i le afiafi o le Aso Faraile e le ausiva a Don Bosco lea na ave i ai le faaaloalo latou te taualugaina faafiafiaga o le aso faapitoa o uso i Sasae.
Ae o le tuuga fautasi, na amata mai lava le lē fiafia o Samoa ina ua maua ua iai se isi ua faaleaga le vaega i luma o le vaa. O lea ua taofia e leoleo a le teritori se alii talavou ua tuua‘ia i lona faaleaga o lea vaega o le vaa.
Sa iai le fuafuaga e lē tauva le auvaa a le Don Bosco Segavao. Peitai na ofo le malo o Amerika Samoa o le a o latou toe faalelei le vaega o le fautasi ua faaleagaina ma faatino lava lea tulaga.
Oo ane i le taeao o le Aso Faraile ae tolopo le tuuga ona o le sou tele o le sami ma e lua sa o Amerika Samoa na toeitiiti lava a faaletonu ai ona ua magoto i le sami a o lei amata le tuuga fautasi.
Sa oo i le Aso Toonai toe taumafai ae na toe tolopo foi ona o le tulaga lava lea ua lē mafai se tuuga vaa i le leaga tele o le tau ua sou tele le sami.
Lea la ua tuu mai ai i le taeao nei, le taeao lea o le Aso Gafua a Amerika Samoa ma ua foi mai la i Samoa nei le aumalaga a le atunuu ma isi sui o taaloga na tausinio i Amerika Samoa aemaise le aumalaga tele o faioloa na faatino ni a latou faaaliga mo le vaiaso o le fu‘a i Tutuila, ae na o le auvaa lava a le Segavao lea o loo i Amerika Samoa i le taimi lenei seia mae‘a le tausinioga lea ua faalua ono tolopo.
O le faamatalaga a Vaimasenuu Zita Martel, lea e kapeteniina le sa e tasi mai i Samoa a leaga foi le tau i le asō, e lē tauva le Don Bosco Segavao ona e faamuamua lava soifua o tama aoga ia e faafoeina lenei sa.
O le sa lenei o le La o Samoa lea na faatau mai e le Don Bosco ona ua leaga uma sa e lua o le aoga sa faaaogā i tausaga ua mavae. O le mau a le aoga, e sili ai le faatau atoa o le sa ona e fai lava si taugata pe a na o le ave e faaaogā toe faafoi mai ai lea i le La o Samoa.
O lea na faapaia lelei i se sauniga lenei vaa ae ua ese lenei tausaga ua tele lava faafitauli ua feagai ma le auvaa a o lea e lei faataunuuina le tuuga na masii atu ai i Amerika Samoa.
