Ua sosoo nei le tolu o tausaga o fai le faaaliga taleni piano a le susuga ia Poulima Salima i le malumalu o le Ekalesia Metotisi i Mt Albert. Ma o lenei polokalame i tausaga taitasi ua maitauina ai le faatuputupulaia o fanau o loo faaaogāina lenei avanoa e fafagu ai le taleni ma faaaogā le meaalofa mai le Atua o loo taotaomia e tatau ona lalaga.
Ae ua molimau faatasi ai ma le lagolago malosi a mātua, faapea susuga i faafeagaiga e unai fanau auā o le lumanai lea o le galuega a le Atua i totonu o Ekalesia e ala i le taina o pese.
O lenei avanoa, o loo tatala i soo se tasi, mai lava le 5 tausaga e oo i luga i tagata matutua. E eseese aso e faia ai vasega a tamaiti aoga, ae ‘afa itula a le tamaitiiti e aoaoina ai le faitauina o nota ma le taina o le piano. Ma o nei aoga uma e faataunuuina lava i le maota o le susuga ia Poulima Salima i Mount Albert, i le taimi e tuua ai aoga a le fanau ma le mānava o galuega.
O le afiafi o le Aso Sa 15 o Novema, na tumutumu ai le malumalu o le Ekalesia Metotisi i Mt Albert i mātua, aiga, uo ma ē masani na taupati atu e tapuaia le auai o a latou fanau i lenei faaaliga tele.
Na matagofie le faafofoga ma le silasila a le aumaimoa i le maualuga o le tomai ma le iloa ua oo i ai fanau i le taina o le piano ma le usuina o pese.
O le 80% tagata Samoa sa auai ae o le 20% o papalagi, auā o le tasi lea alo o Samoa o loo logologoā ma maua ana faailoga i le musika le susuga ia Poulima Salima ae ua ia faasoa nei lana taleni mo lona atunuu aemaise i fanau o loo naunau i le fia maua o lea meaalofa.
E 20 fanau sa auai i lenei faaaliga, e to‘a 4 i latou sa taina le piano ma usu le pese, o Jericho Avaiki, Henry Aokuso, Lemanaia Ponifasio, ma Theodora Fomai, faapea i latou na o le taina o musika, o Eseta Fale, Lala Tavesi, Millie-Lei-Hansell, Sarah Latu, Talalelei Taape, Luella Bracey, Emma Huch, Henry Fitu, Katerina Fale, Saufunasina Opapo, Elijah Lasi, Marie Kepaoa, Junior Utumapu, Tony Mose, Canaan Setefano ma Aisea Maile.
O nisi o i latou sa auai i faaaliga e lua ua tuanai, ae o loo maua pea le avanoa e faalautele ai le tomai i lenei taleni, ae o nisi e tasi ma le ‘afa tausaga sa aooga ai. E tasi le masina sa tuuina e tapena ma sauniuni ai tamaiti i lenei faaaliga. O le faamoemoe maualuga o le susuga i le faiaoga ia Poulima Salima i lenei faaaliga, ia avea o se avanoa e to‘a lelei, aua ne‘i iai se fefe i fanau i luma o tagata i le taina o le piano ma le usuina o pese.
Ma ua vaaia ai le tele o le suiga o tamaiti i lenei polokalame talu ona mae‘a isi faaaliga e lua ua tuanai. O le agaga faafetai o Poulima na faaiu ai le polokalame o le afiafi i mātua ma susuga i faafeagaiga ona o le lagolago ma le unai mai o fanau e faatāua lea avanoa, ma faaiu ai loa i le iputi na saunia e mātua ma fanau aoga.
