I le tulaga mataina ma le faafiafiaina sa iai i Dubai peitai ane pei e faateia le silasila ma le maimoa e lē gata ia Samoa lava ia, ae o nisi foi o loo latou tulimataia le ‘au taitoafitu a Samoa i le taamilosaga o loo faagasoloina nei.
O le tele o ‘au sa lē mafaufauina e ono tulai mai i le taimi nei peitai ua foliga mai ua ese foi le televave ua iai le suiga i a latou foi taumafaiga.
Masalo o loo talanoa le toatele i le misia o Perez i le ‘au a Samoa ona o le tiotio o lenei alii taalo faapea foi avanoa sa mafai ona ia kolosia ai le laina sikoa i le tele o taimi i osofaiga a le Manu.
E lē taumateina le tulaga malolosi o tama taaalo ae o loo iai lava nai faaletonu i nisi taimi o le taaloga i le puipuiga, ma le faatamala lava o loo mafua ai ona kolosia le laina sikoa a Samoa.
Atonu e avea le toilalo i nisi o ana taaloga i Aferika i Saute e ono vaaia ai se isi suiga lelei i le faationoina lea o le tulaga sa tau faatamala ai i le vae lona tolu i Aferika i Saute. Ua agai mai nei i Niu Sila i le vaega lona fa o lenei taamilosaga, ma e iai le talitonuga e siitia se taumafaiga a le Manu i Niu Sila nei, o se tasi foi lenei o vae na mafai ona tulaga muamua ai le Manu i ana taaloga.
Atonu o le lagona na oo ia Niu Sila i le vae i Dubai i le la taaloga ma Samoa, o se vaaiga foi lena ia Samoa i le taimi lenei ina ua mavae le vae i Aferika i Saute. O le itu e fiafia ai, e avea lagona mafatia e mafai ona fanau mai ai le tinou ma le agaga maumauai e puipui i avanoa e ono toilalo ai.
E lē taumate ua toe tapena nei le alii faiaoga ma le pulega i le vae lona fa i Niu Sila, atonu e ono toe faafoi mai ai le Manu Samoa Sevens i le faaeaina; e sa‘o ai foi upu a le atunuu, “E lē o se ta lava ma se lavea.”
Tatou talosia ia tapenaga a le alii Faiaoga faatasi ai ma le pulega a le Manu Samoa taitoafitu, ina ia faaeaina ai Samoa i le vae lona fa i Niu Sila nei ia Fepuari ma avea o se meaalofa lelei mo tatou i le tausaga fou. Ina ua mae‘a taaloga i Aferika i Saute, o le faatulagaina la nei o Au i le taamilosaga a le IRB Sevens.
1. Niu Sila 2. Falani
3. Fiti 4. Aferika i Saute
5. Samoa
Vaaiga faaiu i le iuga o le vae i Aferika i Saute
Wales 26 – 14 Fiji
South Africa 35 – 0 Argentina
New Zealand 47 – 2 France
