O le galuega a le Itu Agai i le Palemene, o le fesiligia lea o le faigamalo ia latou galuega, poo tausi i tulafono e faatonutonu ai le faatinoga o galuega faalemalo. E lē gata i lea ae e galue foi le Itu Agai e faalauaitele mea o faaletonu ai le faigamalo, ma faalauaitele foi se isi itu e tatau ona uia e le faigamalo.
E iai taimi e lagolago ai foi e le Itu Agai fuafuaga a le faigamalo ma palota e talia tulafono faaofi a le faigamalo. Ae e iai foi taimi e faitioina ai e le Itu Aga i le faaletonu o le Malo. Afai lava e tele mea o faaletonu ai le faigamalo, e faapena foi ona tele taimi e faitioina ai e le Itu Agai le faigamalo.
O le vaiaso lenei ua tea na faaali mai ai e le Malo a le National e faapea ua pa‘ū le fuainumera o tagata ua ovasiteia i Niu Sila. O le latou faaaliga ua faaali mai ai le latou lagona mimita faapea sa toatele tagata ovasiteia i Niu Sila, ae o lenei ua pa‘ū i lalo le fuainumera o tagata ona ua toatele i latou ua toe tipoti e toe foi i o latou atunuu.
O le faasalalauga a le Malo ua aliali mai le latou toe vivii lava e latou o latou lava ia. Peitai ane, o loo nanā i tua le faaletonu o lenei faasalalauga.
Talu mai le 2009, e lei tumu lava le Kuota a Samoa. Talu mai foi le 2009, e na o le lua tausaga na tumu ai le kuota a le Pasefika, ae o le isi 5 tausaga e le itumu ai lea kuota.
Manatua foi e 1,100 tagata e mafai ona saili avanoa mai e nonofomau i Niu Sila mai Samoa i tausaga taitasi i luga o le Kuota a Samoa. Ae o le kuota a le Pasefika e 250 tagata e mafai ona saili avanoa mai e nofomau i Niu Sila mai Toga ma Fiti, ae 75 tagata mai Tuvalu ma Kiripati.
Ona ou fesiligia lea o le faigamalo pe aisea ua lē tumu aile Kuota a Samoa? Aisea foi ua lē tatala ai le avanoa i tagata Samoa o loo i NiuSila, ma o loo iai o latou visa faigaluega e o ane e faatumu ai le Kuota a Samoa?
Sa ou fesiligia foi pe aisea le mea ua lē avane ai tagata o loo ovasiteia i Niu Sila ma o loo faigaluega ma mautu latou i Niu Sila, e faatumu ai loa le Kuota a Samoa.
O le mafuaaga ua ave ai la‘u lagolago ma le faamuamua ia i latou o loo i NIu Sila ma ua iai o latou visa faigaluega, ona o latou nei ua agavaa e nofomau loa. O le mafuaaga ua ou faaopoopo atu i ai tagata ovasiteia ae ua faigaluega ma mautu o latou aiga i Niu Sila ona o latou nei e lē manaomia le fesoasoani a le Malo e tausi i latou, auā o loo faigaluega ma mautu mea e nonofo ai latou lava ia.
Manatua foi e toatele tagata Niu Sila e lē fiafia i le tatala o le faitotoa e omai saoloto ai tagata mai le Pasefika i Niu Sila, ona afai e leai ni galuega, toe leai ni tupe e maua ai o latou lava fale, e popole loa nei mea ane ua tele se tupe a le Malo e faaalu e fesoasoani ai i tagata mai le Pasefika, ae e lei togi se latou maa e fesoasoani i le faigamalo a Niu Sila.
O le isi itu tāua o la‘u finau atu i le faigamalo a Niu Sila, ona o lea e faavae le Kuota a Samoa i luga o le Feagaiga Faauo a Niu Sila ma Samoa, o se feagaiga e leai lava se isi atunuu o loo iai ma Niu Sila.
Afai la o iai lea feagaiga faaleuo, e tatau ia Niu Sila ona ia amanaia. Ae e manaomia foi i lenei finau poo fea o iai le tofa a le Malo mai Samoa, pe lagolago i lenei mau pe leai. Afai e lagolago e Samoa le maua e tagata o loo i Niu Sila i visa faigaluega ona avane latou e faatumu ai le Kuota a Samoa, e mafai ona lagolago mai i lea mau.
Afai foi latou te lagolagoina le avane o tagata Samoa ua ovasiteia i Niu Sila, ae o loo faigaluega ma mautu mea e nonofo ai e faatumu ai le Kuota a Samoa, e mafai foi ona lagolago mai i lea mau.
O le lagolago a le Malo Samoa i lenei taumafaiga e faigofie ai foi ona ofi i le finagalo o le Malo Niu Sila.
E tāua tele se sao a le Malo Samoa i lenei mataupu ona o lea e faavae le Kuota a Samoa i le feagaiga faaleuo a Niu Sila ma Samoa.
Ua ou finau atu foi i le Malo Niu Sila e alolofa i tagata ovasiteia mai Tuvalu ma Kiripati, auā o nei atumotu ua faaletonu ona o fesuiaiga o le tau. O nisi o atumotu i Tuvalu ma Kiripati ua lē toe aiga.
O le faigamalo a Tuvalu ua fai sa‘o lava le latou talosaga ia Niu Sila e alolofa e aua le toe faafoi atua tagata ovasiteia i Niu Sila ona e lē o toe gafatia e Tuvalu le toe faaopoopo atu o nisi tagata.
O le isi itu tāua ua ou fai atu ai i le faigamalo a Niu Sila, e lē manaia le fai soo o upu e tāua le Pasefika, ae o lea ua oo i tagata ovasiteia, e faaali mai le latou mimita o lea ua tipoti le toatele o tagata i le Pasefika, e mumusu e fesoasoani i ai.
E lē o ni uiga ia e iloa ai se alofa ma le faatāuaina o tagata Pasefika.
