O le faamoemoe ua taunuu o le laau lea o le soifua, e vivii fai a‘e o matou agaga ona o la outou faatamalii ma le silasila i le Atua ma lona finagalo, lo outou alofa tulai ma lo outou finagalo faaaloalo.
“O ai ea le tagata ua e manatu mai ai” ua ulufia lou aao Samoa i faiva o faaaloalo, faaifo mai Lagi manuia ma faatumu ane e le Atua mea ua toesea ona o le fale o le galuega i Perth, faafetai faafetai lava.
E momoli foi le faafetai i le Aufaigaluega paia sa auai, i le susuga i le taitai o le matagaluega ma toeaiina, aemaise le paia o le matagaluega EFKS atoa a Vitoria, tainane le paia lasilasi o uo ma aiga uma o si a matou galuega tauatia‘e, sa alolofa ane ma talisapaia la matou faatalauula atu, le seleni paia ua outou gapatia ai, o loo i le Atua le taui.
E faapitoa se faafetai i le susuga i le toeaina ia Viliamu Finau ona o lona agaga fesoasoani, i lo outou malu sa faataunuuina ai la matou tausala, aemaise o le taumafataga sa gapatia ai nisi o aiga o le ekalesia, faapea le faaili sa faafiafiaina le afifio atu o le atunuu i le faamoemoe, faafetai faafetai tele i lau susuga ma le ekalesia malosi i Dandenong.
E faaleo foi se faafetai tele i alaleo faasalalau aemaise o le Samoa Times i la latou galuega fitaituga o le logologopuialii o Samoa i Melepone e tusa o lo matou sauni e savalia ala o le mativa ona o le toagaogao o Samoa i Perth, faafetai tele ma faalautele e le Atua o tou tiute ma faiva.
Na matuā faatumulia le malu i le mamalu na afifio atu e molimauina ma lagolago aemaise o le togi o se maa mo lo matou fale. O la a le tusi, a mae‘a faatino sa matou galuega, ona faapea ane lea, “Ia aua lava ne‘i ia tei matou ae ia ia te oe le Atua le viiga e faavavau lava”.
O lo outou aao foai i le seleni e onosefulu ma le lua afe tala. Faafetai Faafetai tele lava, e lē lanu lou aao mafola ma le alofa tulai i sa matou upu ma se faamatalaga, ae tau ia o lenei, sa tatou taulaga ua ofoina faatasi mo le Atua ma lana galuega, ia mu ma taliaina e lana Afio.
Faafetai Melepone. Ia outou manuia i le suafa o le Atua silisiliese. Konelio Tali faafeagaiga ma le EFKS i Perth.
