Faaleo alofaaga o le fanau ua aulia le 80 tausaga o si o latou tina tina Selafina Motunuu Vito Mikaele

O le tauaofia ai o le fanau a le tina ia Selafina Motunuu faapea fanau o lana fanau, ma fanau o fanau a lana fanau, na tulai mai ai se aiga toatele ma le maopoopo, toetiiti a maua le selau o i latou sa tupuga mai i lenei tina. E to‘a 11 le fanau, 6 teine ae 5 tama, o nisi o loo nonofo i Amerika, o Samoa faapea ma Niu Sila nei.

O le faamanatuina o le 80 tausaga o le tina, na taufai malaga uma mai ai fanau a le loomatua mai atunuu o loo aumau ai faapea lona tausoga o loo nofo i Amerika Samoa le tina ia Talita Maiava, o ona aiga mai Ausetalia, faapea aiga o le tamā, aemaise o uo ma ē masania na faatasi uma i le Dream Centre i le Aso Toonai ua mavae e fiafia faatasi ma molimau le matagofie o le Atua i lana tausiga i le soifua galue o le tina ia Selafina.

O le loto faafetai ma le viiga o le Atua na muamua ai le polokalame o le aso, lea sa taitai ai le alo o le tina, o loo galue i se tasi o tovine a le Atua i le Ekalesia AOG i Sandriham le susuga i le faafeagaiga ia Sefo Mika.

Na saunoa le faafeagaiga i le alofa o le Atua mai lea tupulaga i lea tupulaga e pei ona iai i totonu o lona aiga. O le tatalo na fofogaina e se tasi o susuga i faafeagaiga sa auai ia Tua Pati.

O molimau taitasi a le fanau i le latou mafutaga ma le tina, sa toe lalaga ma fafagu mai ai le faigata o tiute sa tauave mai e le tina i aso ua alu.

Sa lē faigofie le taumafai e saili manuia auā so latou lumanai lelei, sa faapea foi ona momoli ma lo latou agaga faafetai i le tina e ala i lana tausiga sa fai. Na latou saunia foi ni faafiafiaga e ala i siva ma pesepesega a le fanau e momoli ai a latou faamanuiaga ma alofaaga i lona aso soifua. Na sosoo ma le taumafataga e vavae ai foe o le aso, ae pesepese le faili a le Pineula e faanofo filemu ai le taligasua.

E lei leva ae pa le faititili i le galulu o atigi palau a le ausiva a le Tatau Dance Crew ma o latou sogaimiti ua iila i le faguu, ma amata ai loa ona sioa ai ma le isi loomatua ae galo le taumafataga.

O le molimau a le tina ia Selafina Motunuu na ia saunoa ai i lona loto fiafia ma le agaga faafetai i si ana fanau e tusa ma tapenapenaga na latou faia mo lona aso fanau ae lē gata i lea o le latou tausiga.

Ae na maeu fika a le Fofoga o le aso le susuga ia Motunuu Teofilo Mikaele i lona faasoasoaina o le polokalame, o ia foi o loo galue i le ofisa o faamasinoga i Samoa, ae o le tofa ia Toeta Faamoana Tago na fai ma sui o le fanau e molimolia se upu faafetai i le mamalu o le auvalaaulia, faapea susuga i faafeagaiga sa auai, faatasi ai ma ni meaalofa sa tauaaoina, ae o se tasi o tama matua sa iai, le tofa ia Sea sa talifaitau e faafetaia ai foi le maau ma le faaaloalo.

Aitema a fanau o fanau a le tina e momoli ai o latou alofaaga ma faamanuiaga

Selafina ma lona tausoga

Tina ia Selafina Motunuu ma ona alo faapea nisi o lona aiga