O le taeao segisegi o le Aso Faraile na tea nei na molimauina ai se vaaiga e lē masani ai i le afioaga o Faiaai i Savaii. O le afioaga ua agai faatasi mai e fai sauniga faatasi. Ua fā lelei tausaga o eseese le afioaga ma ua fā foi tausaga e lei toe mafuta faatasi itu e lua na vaeluaina o le nuu.
O se taeao fou lea i le nuu i le afio ai o Fualau ma le aiga alii, Afio Fepuleai, Afio o Tilafono ma le Faavauga, Alalatai le fetalaiga ia Tui Salega na aliitai e lou itu.
O le aumaiga o le igoa a ipu o le suafa o Fepuleai na manatu le afioaga ua lē tusa ai ma faavae o le nuu. Lea la na malepe ai loa ma ta‘ape le afioaga. E fā lelei lava tausaga ia na tulai mai ai lenei feeseeseaiga ae o lea ua faafetaia le mafai ona toe foi i se tasi.
O le faafeagaiga o le afioaga ia Rev. Faasavalu o le EFKS na saunoa i le sauniga o le faaleleiga ma o se tasi o taitai o le nuu ua leva tausaga o taumafai e unai lenei fealofaniga.
O lana saunoaga i le lotu na ave ai le faamamafa i le va nonofo ai, le va o tagata lava ia o le afioaga, le va o le nuu, va o lotu, va o aiga, na faaalia e le faafeagaiga e tāua tele le amanaia.
Faaalia e le faafeagaiga a leai se alofa ma le fefaamagaloai e leai se aogā o nei va nonofo ai. E leai foi se aogā o le galuega a le Atua pe a lē lelei le va o le nuu. O le aiga lava o Fepuleai na faamatua‘ia se leleiga ma o le Aso Faraile la lea na tonu ai loa itu e lua o le a faatautaia se sauniga e faamautu ma toe faafoi ai i le tasi le afioaga o Faiaai ma ana faiganuu.
E pei foi ona laugaina i le malelega a le Ao o le Malo o Samoa i lenei Tutoatasi – e sili le toa na te pulea lona loto nai i lo le toa e a‘ea le ‘olo ma o iina foi le taulai o lenei faaleleiga ina ia toe faatasia le afioaga o Faiaai i se fealofaniga o le a vaaia ai manuia e maua e le afioaga e pei ona iai le talitonuga o taitai o ekalesia lotu i totonu o le afioaga. Na faaalia e sui o le afioaga o Fualau Pene Sila, le faafetai ona ua umi tele ona eseese itu nei o le afioaga ae o suiga lava ua faapea na manatu le nuu ua sopolia ai faavae o le afioaga lea ua toe faafoi i le tulaga na sau ai ma ua uma ai foi se faagaulemalie na feagai ma le afioaga.
Faaalia e le sui o le aiga sa Fepuleai, o Fepuleai Faimata, e leai se aogā e taumafai ai ae e lē o tutusa finagalo o le afioaga ma e leai se aogā o atinae ma taumafaiga ina ia lelei aiga pe afai e lē o iai faamanuiaga ma le lagolago a le nuu.
Na mae‘a le sauniga lotu ona agai ane loa lea o le afioaga ua faatino faaaloaloga ma ua faamautu ai loa le toe foi i le tasi o le afioaga.
