Faalautele le auaunaga a Frankie i Henderson

O le faleoloa a Frankie, o se tasi lea o kamupani ua loa ma agai pea i luma lana tautua ma lana auaunaga i totonu o Niu Sila faapea foi ma Samoa, e lē gata i ana oloa tau i meaai ae faapea foi i lavalava ma tupe lafo mo aiga i Samoa.

O se tasi o ana tautua o le faia lea o le faatau i Niu Sila nei ma totogi ai ae piki le oloa i Samoa i ona faleoloa o loo iai i vaega eseese o le atunuu; o se auaunaga ua fiafia tele i ai le atunuu ona o le lelei ma le taugofie ma faamāmā avega mo i latou.

O le faaitu la i Sisifo o Aukilani i Henderson, ua tatala ai foi le isi ona lālā fou poo lona lālā lona lua lea, mo le mamalu o le atunuu e faafaigata ona agai mai i Magele mo faatauga aemaise o tupe lafo i Samoa.
O le Aso Faraile 14 o Novema na tatalaina ai lenei tautua fou. O le faletua ia Ianeta ma lona alii ia Stefan Mansson o loo faauluulu i ai lenei lālā ma ua faaigoaina foi o le Neta’s Boutique. O loo faapitoa lava lenei auaunaga i laei mo tamā, tina, faapea foi tamaiti, ae lē gata i lea o tautaliga, o sei, ulapu‘a, ato, ma seevae, o nei oloa uma o loo auina sa‘o mai Samoa.

O nisi o oloa o loo aumai mai Saina, o loo iai foi ie siiatoa mo togiga a faalapotopotoga ma Ekalesia faapea ma aiga. O loo mafai foi ona lafo tupe mo aiga i Samoa i se tau taugofie. O se tasi itu lelei o lenei tautua o le sailia mai lea o laei e finagalo i ai mai Samoa pe a lē maua i totonu o le faleoloa.

Ae sa maitauina foi i lea aso le fiafia o le atunuu sa auai i le tatalaina o lenei fale fou, ma sa faatau ai foi o latou laei ona o le mananao i le matagofie o mamanu mai Samoa. Na saunia foi e le faletua ia Ianeta ma le aufaigaluega se iputi mo le malu taeao a le atunuu sa auai.Nisi o le atunuu ma le tamaitai pule ia Ianeta ma ona alii.