O le vaiaso lenei ua tuua ai le atunuu e ni tausi soifua faaolioli se toalua. O se avanoa lē aumaua ua malaga atu ai i Iapani i laua nei mo se avanoa e molimauina ai le faatinoga o galuega faatausi soifua i le aai o Nagano i Iapani i le Iunivesite i lea atunuu.
E iai le feagaiga i le va o le aoga faatausi soifua i Nagano ma le Iunivesite Aoao o Samoa, ma o iina lea ua maua mai ai le avanoa lenei e malaga ma galulue ai i laua nei i totonu o le umi e tusa ma le tolu vaiaso. O i laua ua filifilia mo lenei avanoa o Saunoa Faaiuga Ah Fua ma Aperaamo Soi. O i laua nei o loo tausaga tolu i le aoga faatausi soifua a le Iunivesite Aoao o Samoa i Lepapaigalagala.
O lea toe tasi le tausaga o le tikeri faatausi soifua ae o lea ua agai i Iapani o se vaega lea o le aoaoga o loo feagai ma i laua.
O le Amepasa o Iapani i Samoa le afioga Tuimauagaoalii Kazumasa Shibuta na faalauiloaina lenei fesoasoani e pei ona faatupe ai le faigamalaga ma le taimi o loo iai i laua nei i Nagano. O avanoa nei e malaga ai tausi soifua faaolioli i fafo mo aoaoga ua faalautele, sa tele ina vaaia i le va o Samoa ma Niu Sila i tausaga ua mavae lea lava na agai ai nisi o tamaitai ma alii ma aooga i le aoga faatausi soifua i Napier.
Peitai talu ai o lea ua mautu le aoga faatausi soifua i le Iunivesite Aoao o Samoa, o lea ua saili ai avanoa nei mai isi Iunivesite e pei o Ausetalia ma Iapani ae o le tele lava o aoaoga mo tipiloma ma tikeri ua faatautaia lava i totonu o Lepapaigalagala.
O le aoga faatausi soifua ma le aoga faafaiaoga o loo faatupe e le Malo avanoa ua aooga ai i latou i nei aoga tetele i totonu o le Iunivesite, ona o le unai ia lava i latou e aoaoina i nei auaunaga ona e lē o lava i le taimi nei. O le toe taliu mai o nei tausi soifua o le a faamautu ai loa le laasaga mulimuli o taumafaiga mo le tikeri o le tausi soifua i Samoa nei lava ia.
